निरपानीको मिरजङ्गला गाउँबाट बालक बेपत्ताः क्षेत्रभरि फैलियो चिन्ता

दार्जीलिङ जिल्लाको तराई क्षेत्र नक्सलबारी पुलीस थाना अन्तर्गत निरपानी बस्तीको मिरजङ्गला गाउँमा एक नाबालिग हराएपछि अपहरणको आशंका गर्दै क्षेत्रभरि चिन्ता फैलिएको छ। समाचारअनुसार हराएका नाबालिगको नाम रमेश थापा रहेको र उनी करिब १३ वर्षका रहेको बताइएको छ। समाचारअनुसार ती बालक अचानक बेपत्ता भएपछि परिवारले घटनाबारे पुलीसलाई जानकारी गराएका थिए। घटनापछि पुलीसले तत्काल अनुसन्धान सुरु गरेको छ र बालकको खोजी तीव्र बनाइएको छ। स्थानीय स्रोतका अनुसार बालकलाई कसैले प्रलोभन देखाएर लगेको हुनसक्ने आशंका गरिएको छ, जसका आधारमा पुलीसले अपहरणको कोणबाट पनि अनुसन्धान अघि बढाइरहेको छ। पुलीसले बालकलाई सकुशल फेला पार्नका लागि विभिन्न स्थानमा खोजी अभियान सञ्चालन गरिरहेको र घटनासम्बन्धी थप जानकारी संकलन गर्ने काम जारी रहेको बताइएको छ।