पश्चिम बंगाल विधानसभा चुनाव २०२६ नजिकिँदै जाँदा राज्यको राजनीतिक माहौल झन् तातिँदै गएको छ। यसै क्रममा मुख्यमन्त्री ममता बनर्जीले भारतीय जनता पार्टी (BJP) र केन्द्र सरकारमाथि कडा हमला गर्दै SIR मुद्दालाई लिएर गम्भीर आरोप लगाएकी छन्। हालै सार्वजनिक सभालाई सम्बोधन गर्दै उनले निर्वाचन आयोगको मतदाता सूची पुनरावलोकन प्रक्रियालाई लोकतन्त्रको विरुद्ध भएको भन्दै यसले लाखौँ वास्तविक मतदाताको नाम हटाउने प्रयास भइरहेको दाबी गरिन्। समाचारअनुसार ममता बनर्जीले विशेष गरी गरीब, अल्पसंख्यक र महिलाहरूको नाम लक्षित रूपमा हटाइएको आरोप लगाउँदै यदि एक जनाको पनि वास्तविक मताधिकार खोसिएको पाइयो भने त्यसको विरोधमा कडा आन्दोलन गर्ने चेतावनी दिएकी छन्।
उनले जनतालाई यस्तो अन्यायको जवाफ मतदानमार्फत दिन आग्रह गर्दै “प्रत्येक अन्यायको जवाफ एउटा भोटले दिनुपर्छ” भन्ने सन्देश पनि दिएकी छन्।यसै क्रममा उनले प्रधानमन्त्री नरेन्द्र मोदी र केन्द्र सरकारको पनि आलोचना गर्दै चुनावअघि मतदाता सूचीमा हेरफेर गरेर चुनावी परिणाम प्रभावित गर्न खोजिएको आरोप लगाएकी छन्।
उनले यस्तो कदमलाई “लोकतन्त्रको हत्या” भनेर कडा शब्दमा प्रतिक्रिया दिँदै निर्वाचन आयोगले तत्काल स्पष्टता दिनुपर्ने मागसमेत गरेकी छन्। राज्यभर चुनावी अभियान तीव्र बन्दै गएको अवस्थामा ममता बनर्जी लगातार उत्तर बंगालसहित विभिन्न क्षेत्रहरूमा जनसभाहरू गर्दै आएकी छन्। चुनाव नजिकिँदै जाँदा SIR मुद्दा अहिले पश्चिम बंगालको सबैभन्दा ठूलो राजनीतिक बहसको विषय बनेको छ र BJP तथा TMC बीच आरोप–प्रत्यारोप अझ तीव्र हुने संकेत देखिएको छ।
