भारत सरकारले संसद (लोकसभा) मा दिएको आधिकारिक जानकारीअनुसार “अपरेशन डीप म्यानिफेस्ट” अहिले पनि जारी रहेको र यसको मुख्य उद्देश्य तेस्रो देश हुँदै भारतमा प्रवेश गर्न खोज्ने पाकिस्तानी मूलका सामानहरू रोक्नु रहेको छ। वित्त मन्त्रालयअन्तर्गतको राजस्व गुप्तचर निर्देशनालय (DRI) ले सञ्चालन गरिरहेको यस अभियानअन्तर्गत जुलाई २०२५ सम्म पाकिस्तानी मूलका सामानका कम्तीमा ५ वटा ठूला केस पत्ता लगाइएको र करिब १२ करोड रुपैयाँ बराबरका सामान जफत गरिएको जानकारी सरकारद्वारा लोकसभामा प्रस्तुत गरिएको आधिकारिक कागजातमा उल्लेख छ।
सरकारका अनुसार ती सामानहरू सिधै पाकिस्तानबाट होइन, यूएई (दुबई) जस्ता तेस्रो देशहरू हुँदै भारत पठाइएको पाइएको छ। गलत रूपमा “UAE origin” भनेर घोषणा गरिएको सामान वास्तवमा पाकिस्तानमै बनेको भएको अनुसन्धानले पुष्टि गरेको बताइएको छ। भारतीय अखबारहरूका अनुसार यस अभियानअन्तर्गत नाभा शेवा बन्दरगाहमा ३९ कन्टेनर सामान जफत गरिएको र ९ करोड रुपैयाँभन्दा बढीको अवैध आयात रोकिएको छ। ती सामानहरू पाकिस्तानबाट दुबई पठाएर त्यहाँबाट पुनः भारत पठाइएको पत्ता लागेको छ।
यस कदमलाई सरकारले राष्ट्रिय सुरक्षा र अवैध व्यापार नियन्त्रणसँग जोडेको छ। पाकिस्तानबाट सिधै सामान आयातमा पहिल्यै प्रतिबन्ध लगाइएको भए पनि तेस्रो देश प्रयोग गरेर भारतमा सामान पठाउने प्रयास बढेपछि “अपरेशन डीप म्यानिफेस्ट” सुरु गरिएको बताइएको छ। यसैबीच २०२५ मा भएको पहलगाम आक्रमणपछि भारत–पाकिस्तानबीचको तनाव बढेको र त्यसपछि पाकिस्तानसँग सम्बन्धित व्यापार तथा आवतजावतमा थप कडाइ गरिएको पनि समाचारहरूमा उल्लेख छ।
