अरुणाचल प्रदेशको चाङ्लाङ जिल्ला अन्तर्गत नमपोङ निवासी प्रतिभाशाली युवा फुटबलर विवेक गुरुङ अब राष्ट्रिय स्तरको प्रतिस्पर्धामा आफ्नो पहिचान बनाउने तयारीमा छन्। उनले हाल जारी रहेको प्रतिष्ठित दिल्ली प्रिमियर लीगमा शास्त्री एफसीको प्रतिनिधित्व गर्दै आगामी मार्च १९ मा आफ्नो डेब्यु खेल खेल्ने भएका छन्।
दिल्लीमा सुरु भइसकेको उक्त लिगले देशभरिका उदीयमान खेलाडीहरूलाई आफ्नो प्रतिभा प्रदर्शन गर्ने महत्वपूर्ण मञ्च प्रदान गर्दै आएको छ। विवेक गुरुङका लागि यो अवसर उनको खेल जीवनको एक महत्वपूर्ण मोडको रूपमा हेरिएको छ। शास्त्री एफसीले आफ्नो पहिलो खेलमा गढवाल हिरोज एफसी विरुद्ध १–० को महत्वपूर्ण जित हासिल गरेको थियो। तर, विवेक गुरुङ टोलीमा ढिलो समावेश भएका कारण उक्त खेलमा विश्राममा राखिएका थिए, किनकि उनी खेल सुरु हुनु एक दिनअघि मात्र टोलीसँग आबद्ध भएका थिए।
उल्लेखनीय छ कि शास्त्री एफसीले गत वर्षको दिल्ली सुपर डिभिजन टुर्नामेन्ट जित्दै यस वर्षको दिल्ली प्रिमियर लिगमा पदोन्नति हासिल गरेको हो। विवेक गुरुङको टोलीमा समावेश हुनु चाङ्लाङ जिल्लाका लागि मात्र नभई समग्र पूर्वोत्तर क्षेत्रकै लागि गर्वको विषय बनेको छ। पछिल्ला वर्षहरूमा यस क्षेत्रबाट राष्ट्रिय स्तरका प्रतियोगिताहरूमा खेलाडीहरूको सहभागिता निरन्तर बढ्दो क्रममा रहेको छ, जसले यहाँको फुटबल प्रतिभाको उज्ज्वल भविष्य संकेत गर्दछ।
