सिक्किमका विभिन्न क्षेत्रमा आइतबार साँझ अचानक मौसम खराब भई तीव्र हावाहुरी, भारी वर्षा र असिना परेको छ। साँझतिर अचानक मौसम परिवर्तन भएसँगै शक्तिशाली हावाहुरी चलेको र केही स्थानमा रूख ढलेर सामान्य जनजीवन प्रभावित भएको स्थानीय स्रोतहरूले बताएका छन्। धेरै क्षेत्रमा ठूलो वर्षासँगै असिना परेको देखिएको छ, जसका कारण सडक यात्रा केही समयका लागि कठिन बनेको छ। केही स्थानमा हावाहुरी र वर्षाका कारण विद्युत आपूर्तिमा समेत अस्थायी अवरोध आएको जानकारी प्राप्त भएको छ।
मौसमविद्हरूका अनुसार हाल सक्रिय रहेको पश्चिमी विक्षोभ का कारण पूर्वोत्तर भारतका विभिन्न क्षेत्रमा गर्जनसहित वर्षा, चट्याङ र तीव्र हावाहुरी देखिन थालेको हो। IMD ले उप–हिमालयी क्षेत्रअन्तर्गत सिक्किम तथा आसपासका क्षेत्रमा मार्च १५ देखि १७ सम्म मेघगर्जन, चट्याङ, ३०–५० किलोमिटर प्रतिघण्टासम्मको हावाहुरी तथा मध्यमदेखि भारी वर्षा हुने सम्भावना रहेको जनाएको छ।
मौसम विभागले आगामी केही दिनसम्म मौसम अस्थिर रहने सम्भावना रहेको भन्दै सतर्क रहन आग्रह गरेको छ। पहाडी क्षेत्रमा चट्याङ, असिना तथा अचानक हावाहुरीका कारण सडक यातायात, विद्युत आपूर्ति तथा दैनिक गतिविधिमा थप प्रभाव पर्न सक्ने चेतावनी दिइएको छ। स्थानीय प्रशासनले पनि सर्वसाधारणलाई आवश्यक सावधानी अपनाउन, अनावश्यक यात्रा नगर्न तथा मौसमसम्बन्धी आधिकारिक सूचना नियमित रूपमा हेर्न आग्रह गरेको छ।
