खरसाङ, (निसं): अब 25 दिन तरल पेट्रोलियम ग्यास नआउने हल्ला फैलिएपछि खरसाङ्का उपभोक्ताहरूले फटाफट ग्यास बिकिङ गर्न शुरु गरे। यस्तै हल्ला फैलिएकोले खरसाङ्को इण्डियन ग्यासको रोशनी ग्यास एजेन्सीको कार्यालयमा बिहानको समयमा ग्यास प्राप्त गर्न आउनेहरूको निकै भीड़ रहेको थियो भने बेलुकासम्म यस एजेन्सीमा मानिसहरू ग्यास बुक गर्न अनि ग्यास सिलिण्डर लिनलाई आइरहेका थिए। ईरान, अमेरिका, ईज्रायल युद्धपछि मानिसहरूमा पेट्रोल, डिजल, तरल पेट्रोलियम ग्यासको कमी हुन सक्ने सम्भावनाले चिन्ता बढ़ेको छ।
डुमाराम बस्तीकी एक महिलाले आगामी 25 दिनसम्म ग्यासको भरी सिलिण्डर नाआउने सुनेपछि आफूले थप ग्यास बुकिङ गरेको बताइन्। तिनले भनिन्, मैले हालैमा ग्यासको नयाँ सिलिण्डर जड़ान गरेकी छु। यसले एक महिना जति पुग्छ होला, आब 25 दिनपछि मात्र ग्यासको सिलिण्डर आउछ अरे त्यसैले अहिलेनै ग्यास बुकिङ गरेकी छु, चलाउदै गरेको सकिएपछि ठीक समयमा अर्को ग्यास आइपुग्छ। तिनले वर्तमानसम्म ग्यासको कुनै संकट आफूले भोग्न नपरेको बताउदै वर्तमानमा ग्यासको मूल्यमा भने 60 रुपियाँ बढ़ेकोले अघिको भन्दा 60 रुपियाँ अधिक भुक्तान गर्न परेको बताइन्। धोबि खोलाकी एक उपभोक्ताले पनि आगामी 25 दिनसम्म भरी ग्यास सिलिण्डर नआउने सुनेपछि आफू ग्यास लिनलाई आएकी बताइन्। तिनले पनि वर्तमानसम्म समयमा ग्यास प्राप्त गरिरहेकी बताउदै अब ग्यासको कमी हुन सक्ने सम्भावना रहेको पनि बताइन्।
यस बारेमा रोशनी ग्यास एजेन्सीका तनुज गर्गले भने, वर्तमानसम्म घरेलु तरल पेट्रोलियम ग्यासको आपूर्तिमा कुनै कमी आएको छैन। कमर्शियल ग्यासको आपूर्ति भने कम भइरहेको छ। आगामी 25 दिनसम्म भरी सिलिण्डर आउदैन भन्ने कुरो पूर्ण रूपले मिथ्या हो। ग्यासको सिलिण्डर डेलिभरी भएको 25 दिनसम्म रसिद काटिन्दैन भनिएको हो, यसलाई मानिसहरूले गलत बुझेका हुन सक्छ। ग्यासको सिलिण्डर डेलिभरी भएको 25 दिन अघि कसैले पुनः ग्यास बुकिङ गरेको खण्डमा बुकिङ त हुन्छ तर रशित काटिन्दैन। रसिद नकाटिएपछि ग्यास डेलिभरी पनि हुन सक्दैन। वर्तमानमा एजेन्सीका कार्यालयमा उपभोक्ताहरूले भीड़ लागिरहेको बारेमा बताउदै तिनले भने, मानिसहरूमा एक प्रकारको अनावश्यक पेनिक छ, विगत दुई दिनदेखि कम्पनीको सर्वर अति धिमा रहेको छ, यसो हुँदा रसित काटिएको थिएन। यसैले पनि उपभोक्ताहरू धेरै संख्यामा कार्यालयमा आएका हुन्। तिनले वर्तमानसम्म घरेलु खाना पकाउने ग्यासको आपूर्ति आवश्यक अनुरुप आपूर्ति भइरहेकोले यस विषयमा पेनिक नहुने अपिल गरे।
ईरान, अमेरिका, ईज्रायल युद्धको 11 दिन पार गरिसकेको भए तापनि अहिलेसम्म खरसाङ्मा तरल पेट्रोलिसम ग्यास, पेट्रोल अनि डिजलको कमी भएको छैन। तरल पेट्रोलियम ग्यासको मूल्यमा 60 रुपियाँ वृद्धि भएको भए तापनि पेट्रोल अनि डिजलको मूल्यमा कुनै वृद्धि भएको छैन। वर्तमानमा खरसाङ्मा पेट्रोलको मूल्य 1 सय 6 रुपियाँ 74 पैसा रहेको छ।
