बालेनले मन्त्रालयको संख्या घटाउने तयारी : भावी प्रधानमन्त्री बालेन शाहले हालको २२ वटा मन्त्रालयको संरचनालाई १४–१५ वटा मन्त्रालयमा सीमित गर्ने योजना बनाएका छन्। उनका अनुसार यसरी मन्त्रालय घटाउँदा सरकारको कार्यक्षमता बढ्ने र प्रशासनिक खर्च पनि घट्ने अपेक्षा गरिएको छ।
संविधानअनुसार एउटा सरकारमा अधिकतम २५ जना मन्त्री राख्न सकिन्छ, त्यसैले मन्त्रालय संख्या घटाउन संविधान संशोधनको आवश्यकता छैन। बालेनले यो योजना आफ्ना निकट नेताहरूसँग छलफल गरिसकेका छन् र आगामी मन्त्रिपरिषद गठनमा यसलाई कार्यान्वयन गर्ने तयारीमा छन्।
राष्ट्रिय स्वतन्त्र पार्टी (रास्वपा) ले भावी प्रधानमन्त्रीको रूपमा वरिष्ठ नेता बालेन्द्र शाह ‘बालेन’लाई प्रस्ताव गरेपछि प्रतिनिधिसभा सदस्य निर्वाचनबाट मतदाताले त्यसलाई अनुमोदन गरिसकेको छ। फागुन २१ गते सम्पन्न निर्वाचनबाट रास्वपाले झण्डै दुईतिहाइ बहुमत प्राप्त गरेपछि बालेन बालेन्द्र प्रधानमन्त्री बन्दैछन्।
प्रत्यक्षतर्फका १६५ क्षेत्रको मात्रै नतिजा बाहिर आएको छ। निर्वाचन आयोगले रास्वपा उम्मेदवार किशोरी साह ‘कमल’को नाम कालोसूचीमा रहेको भन्दै उम्मेदवारी खारेज गरेको थियो।
२०८२ पुस १३ गते भएको रवि लामिछाने र बालेन्द्र शाहबिचको सहमतिको ४ नम्बर बुँदामा प्रतिनिधिसभा निर्वाचनपछि संसदीय दलको नेता र भावी प्रधानमन्त्रीको उम्मेदवार बालेन्द्र शाह हुने उल्लेख छ। सोही सहमतिअनुसार बालेन्द्र शाह प्रधानमन्त्री बन्ने निश्चित भएको हो।
नेपालको संविधानको धारा ७६ को उपधारा (१) मा लेखिएको छ, ‘राष्ट्रपतिले प्रतिनिधि सभामा बहुमत प्राप्त संसदीय दलको नेतालाई प्रधानमन्त्री नियुक्त गर्नेछ र निजको अध्यक्षतामा मन्त्रिपरिषद्को गठन हुनेछ ।’ झापा निर्वाचन क्षेत्र नम्बर ५ बाट प्रतिनिधिसभा सदस्य पदमा निर्वाचित भएका बालेनले प्रधानमन्त्री बन्नुअघि प्रतिनिधि सभामा बहुमत प्राप्त दल राष्ट्रिय स्वतन्त्र पार्टीको संसदीय दलको नेता बन्नुपर्नेछ।
प्रतिनिधि सभा सदस्य निर्वाचन ऐन, २०७४ को दफा ५८ अनुसार पहिलो हुने निर्वाचित हुने (प्रत्यक्ष) निर्वाचन परिणामको प्रकाशन निर्वाचन अधिकृतले गर्ने व्यवस्था गरेको छ।
