भारतीय गोर्खा प्रजातान्त्रिक मोर्चाका अध्यक्ष एवं गोर्खाल्यान्ड क्षेत्रीय प्रशासनका प्रमुख कार्यपाल अनित थापाले एसआइआरमा डिलिट अनि एडजुडिकेट हुने मुद्दा गम्भीर मुद्दा भएको बताएका छन्। उनले, डिलिट हुनु भनेको सरकारको भाषामा भारतको नागरिक नहुनु हो। डिलिट भएपछि प्यानकार्ड एक्टिभ हुँदैन, आधार कार्ड एक्टिभ हुँदैन, बैंक एकाउन्टलाई धक्का लाग्छ। नौकरी गर्नेको नौकरी जाने बताए।
प्रमुख कार्यपाल अनित थापाले दार्जीलिङ्ग, कालेबुङ, मिरिक अनि खरसाङ क्षेत्रको मानिसहरूको सहयोगको निम्ति लिगल सेल सुरु गर्ने बताए। न्यायालय समक्ष विचाराधीन मुद्दालाई हेल्प लाइनले केही सहयोग गर्दैन। उनले रोहिणी क्षेत्रबाट साढे छ सौ मतदाता डिलिट हुनु भनेको यहाँको आधी मान्छे नै जानु भएको बताए।
यसअघि पनि भारतीय गोर्खा प्रजातान्त्रिक मोर्चाका अध्यक्ष अनित थापाले सम्पन्न एसआइआर मतदाता सूचीमा धेरै मतदाताको नाम काटिएको घटनालाई गम्भीर मुद्दा बताउँदै सबैले राजनीति छोडेर सहयोग गर्नुपर्ने बताएका थिए। मिरिकमा आयोजित पार्टीको चुनावी सभामा बोल्दै थापाले भने, “एसआईआर-को सूचीमा मतदाताको नाम हटाएर एक मतदाताको चिन्हारीलाई नै धूमिल पारेको छ। यो हाम्रो निम्ति गम्भीर कुरा हो। हाम्रो मतदाताको नाम काट्दा उसको आइडेन्टिटी नै हराएको छ। नाम काटिएको व्यक्ति को हो, कहाँ को हो त्यो नै हराएको छ।”
यसरी नै कालेबुङको भागोप्रमोका विधायक रुदेन सादा लेप्चाले, बीजेपीद्वारा एसआइआर मार्फत बङ्गालमा एउटा विशेष धर्म अपनाउने जातिलाई टार्गेट गरेको छ भने पहाडमा गोर्खा जातिलाई छताछुल्ल पार्नु खोजेको छ। बीजेपीको गोर्खामाथि सतावट भएको बताएका छन्। यसै गरी भागोप्रमोका प्रवक्ता केशवराज पोख्रेल भन्छन्, बीजेपीको राष्ट्रीय अध्यक्ष नितिन नवीनले डिक्टेट, डिलिट, डिपोर्टको स्ट्रेटेजी अपनाउने घाेषणा नै गरेका छन् भने अमित शाह स्वयंले डिलिट मात्र होइन डिपोर्ट गर्ने बयान दिएका छन्। यसको अर्थ मतदाता सूचीमा नाम नहुनेलाई खेद्ने कुरा हो।
करिब पचास हजार गोर्खाको नाम काटिएको छ या विचाराधीन छ। आज ठेगाना बिनाको सांसदले यस्तो केही होईन भन्नु फेरि गोर्खालाई भड्खालोमा हाल्नु खोज्दैछ। बीजेपीले माइक्रो अबजर्भरको नाममा विभिन्न भाजपा शासित राज्यबाट अधिकारी बङ्गालमा ल्याएका थिए। नाम डिलिट गर्नुको कारण तिनै माइक्रो अबजर्भरको काम भएको बताए।
