पश्चिम बंगालकी मुख्यमन्त्री ममता बनर्जीले भारतीय जनता पार्टी (भाजपा) माथि गम्भीर आरोप लगाउँदै राष्ट्रपतिलाई राजनीतिक उद्देश्यका लागि प्रयोग गरिएको दाबी गरेकी छन्। कोलकाताको मेट्रो च्यानलमा आयोजित तृणमूल कांग्रेसको धरना कार्यक्रमलाई सम्बोधन गर्दै उनले यस्तो टिप्पणी गरेकी हुन्।
ममता बनर्जीले भनिन् कि भाजपा यति तल झरेको छ कि राष्ट्रपतिको नाम प्रयोग गरेर पश्चिम बंगाललाई बदनाम गर्ने प्रयास भइरहेको छ। उनले राष्ट्रपतिप्रति पूर्ण सम्मान रहेको उल्लेख गर्दै राष्ट्रपतिको पद देशको संवैधानिक पद भएकाले त्यसलाई राजनीतिक विवादमा तान्नु उचित नहुने बताइन्।
उनले आदिवासी समुदायको विषयमा पनि भाजपा सरकारले दोहोरो व्यवहार देखाएको आरोप लगाइन्। ममताले प्रश्न उठाउँदै भनिन् कि मणिपुर लगायत भाजपा शासित राज्यहरूमा आदिवासी समुदायमाथि अत्याचार हुँदा राष्ट्रपति किन मौन बसेको देखिन्छ? उनले राष्ट्रपतिलाई पश्चिम बंगालमा आदिवासी समुदायका लागि राज्य सरकारले गरेका विकास कार्यहरूको सही जानकारी नपुगेको हुनसक्ने पनि बताइन्।
ममता बनर्जीका अनुसार पश्चिम बंगाल सरकारले आदिवासी समुदायका लागि शिक्षा, स्वास्थ्य तथा सामाजिक योजनामार्फत धेरै महत्वपूर्ण काम गरेको छ। उनले राज्य सरकार आदिवासीहरूको विकास र कल्याणका लागि निरन्तर काम गरिरहेको दाबी गरिन्।
यसैबीच भारतका प्रधानमन्त्री नरेन्द्र मोदीले सामाजिक सञ्जाल ‘एक्स’ मार्फत सिलिगुडीमा राष्ट्रपतिको कार्यक्रममा भएको घटनाबारे प्रतिक्रिया जनाउँदै त्यसलाई लज्जास्पद र अभूतपूर्व घटना भनेका छन्। उनले लोकतन्त्र र आदिवासी समुदायको सशक्तिकरणमा विश्वास गर्ने सबै मानिस यस घटनाबाट स्तब्ध भएको बताएका छन्।
मोदीले आदिवासी समुदायबाट आएकी राष्ट्रपतिले व्यक्त गरेको पीडा र चिन्ताले देशका नागरिकलाई गहिरो दुःख दिएको बताएका छन्। उनले पश्चिम बंगालको तृणमूल कांग्रेस सरकारमाथि राष्ट्रपतिप्रति अनादर देखाइएको आरोप लगाउँदै यसका लागि राज्य प्रशासन जिम्मेवार रहेको बताएका छन्। साथै उनले राष्ट्रपतिको कार्यालय राजनीति भन्दा माथि रहेको र त्यसको गरिमा सधैं सुरक्षित राख्नुपर्ने बताएका छन्।
