दार्जीलिङ,29 फरवरी(निसं): हुक्कर रोड-हेप्पी भ्याली मार्गलाई राकेश सार्की रोड नामाकरण गरियो।हेप्पी भ्याली, शनिबार हुक्कर रोडदेखि हेप्पी भ्याली क्षेत्रसम्म जाने सडकलाई एक कार्यक्रमवीच शनिबारदेखि औपचारिक रूपमा राकेश सार्की रोड नामाकरण गरिएकोछ। हेप्पी भ्यालीका 6 वटा समाज, जीटीए , पञ्चायत समिति, विभिन्न राजनैतिक दल तथा जातीय संगठनहरूको संयुक्त पहलमा उक्त मार्गलाई स्वर्गीय समाजसेवी राकेश सार्कीको नाममा समर्पित गरिएको हो भनी सदर-1 समष्टि अध्यक्ष अमृत योञ्जनले जानकारी गराएका छन्।योञ्जनको जानकारी अनुसार, स्वर्गीय राकेश सार्की हेप्पी भ्याली समाजका एक समर्पित समाजसेवी थिए।
उनले आफ्नो जीवनकालमा थुप्रै सामाजिक कार्यहरूमा सक्रिय योगदान दिएका थिए। दुर्भाग्यवश, उनको असामयिक निधनपछि समाजले उनको योगदानको उच्च मूल्याङ्कन गर्दै यस सडकलाई उनको नाममा नामाकरण गरेको हो। नामाकरण समारोहमा अल इण्डिया सेड्युल कास्ट एसोसिएसन-का केन्द्रीय समिति सदस्यहरू, पञ्चायत समिति सभाधिपति दिक्षेन बम्जन, समष्टि अध्यक्ष अमृत योञ्जन, सचिव समरिश गुरुङ, दावा लामा तथा हेप्पी भ्यालीका सबै 6 वटा समाजका प्रतिनिधिहरूको उल्लेखनीय उपस्थिति रहेको थियो।
कार्यक्रममा स्वर्गीय राकेश सार्कीको स्मरणमा पूजा-अर्चना गरिनुका साथै राकेश सार्की रोड लेखिएको साइन बोर्ड-को उद्घाटन समेत गरिएको थियो। समाजसेवामा उनको अतुलनीय योगदानलाई चिरस्मरणीय बनाउने उद्देश्यले गरिएको यस पहललाई स्थानीयवासीहरूले स्वागत गरेका छन्।
