असम तथा सम्पूर्ण भारतका गोर्खाली समुदायका लागि गर्वको खबर सार्वजनिक भएको छ। प्रतिभाशाली महिला क्रिकेटर गायत्री गुरुङ उत्कृष्ट खेलकौशल, अनुशासन र निरन्तर मेहनतका कारण राष्ट्रिय स्तरको टोलीमा स्थान बनाउन सफल हुनुभएको छ। उहाँसँगै सक्षम खेलाडी जिन्तिमणि कलिता र अमन्तिका मुन्डा पनि टोलीमा छनोट हुनुभएको छ भने मेहनती खेलाडी रिमा पेगुलाई स्ट्यान्डबाइ खेलाडीको रूपमा राखिएको छ।
उक्त प्रतिष्ठित प्रतियोगिता मार्च ५ देखि मार्च १५, २०२६ सम्म भारतको प्रसिद्ध प्रविधि नगरी बैंगलुरूमा आयोजना हुने भएको छ। यस प्रतियोगिताले देशभरिका क्रिकेटप्रेमीहरूको ध्यान तानेको छ र खेलाडीहरूलाई आफ्नो प्रतिभा प्रदर्शन गर्ने ठूलो अवसर प्रदान गर्नेछ।
गोर्खाली समुदायकी गौरवशाली छोरी गायत्री गुरुङले प्राप्त गरेको यो ऐतिहासिक सफलता केवल एउटा व्यक्तिगत जित वा नाममा मात्र सीमित छैन; बरु यो त समस्त गोर्खा समाजको प्रतिष्ठा र पहिचानका लागि एउटा अतुलनीय कोशेढुङ्गा सावित भएको छ। एउटा सामान्य परिवेशबाट उठेर राष्ट्रिय तथा अन्तर्राष्ट्रिय स्तरमा आफ्नो स्थान सुरक्षित गर्नु पक्कै पनि सहज थिएन, तर उहाँको विगतको कठोर संघर्ष, अटुट लगनशीलता र खेलकुदप्रतिको निस्वार्थ समर्पणले आज यो सुनौलो दिन सम्भव तुल्याएको हो। गायत्रीको यो यात्राले के प्रमाणित गरेको छ भने, यदि दृढ इच्छाशक्ति र मेहेनत छ भने जुनसुकै बाधालाई पनि पन्छाउन सकिन्छ।
उहाँको यो कीर्तिमानले विशेषगरी समाजका कुना-काप्चामा लुकेर रहेका प्रतिभाहरू र खेलकुदमा भविष्य खोजिरहेका नयाँ पुस्ताका युवाहरूका लागि उर्जाको सञ्चार गरेको छ। खेलकुद क्षेत्रलाई केवल मनोरञ्जनको साधन मात्र नभई एउटा सम्मानित करियरको रूपमा हेर्नुपर्छ भन्ने सन्देश प्रवाह गर्दै, यस उपलब्धिले आगामी दिनमा थुप्रै चेलीहरूलाई मैदानमा ओर्लन थप हौसला, आत्मविश्वास र मार्गदर्शन प्रदान गर्ने पूर्ण विश्वास गरिएको छ।
