ओपनर ब्रायन बेनेट (अविजित ६३) को अर्धशतकीय इनिङ्सको दममा जिम्बाब्वेले श्रीलंकालाई ६ विकेटले पराजित गरी आईसीसी टी–२० विश्व कपमा ग्रुप चरणको अन्तिम खेलमा जित हासिल गरेको हो। जितसँगै जिम्बाब्वे चार खेलमा ७ अंकका साथ ग्रुप विजेता बन्यो। यसैगरी श्रीलंका ६ अंकका साथ दोस्रो स्थानमा रह्यो। यी दुई टोलीले अघिल्लो सुपर ८ चरणमा स्थान बनाइसकेका हुन्।
आर प्रेमदासा स्टेडियममा भएको खेलमा श्रीलंकाले पहिले ब्याटिङ गर्दै २० ओभरमा ७ विकेट गुमाउँदै १५८ रन बनाएको थियो। जवाफमा जिम्बाब्वेले ३ बल बाँकी रहँदा ४ विकेटको क्षतिमा १६२ रन बनाउँदै लक्ष्य भेट्टायो।
जिम्बाब्वेका लागि ब्रायन बेनेटले उत्कृष्ट इनिङ्स खेल्दै ५८ बलमा ६३ रन बनाए। उनले ४ चौका र २ छक्का प्रहार गरे। कप्तान सिकन्दर रजाले २६ बलमा ४५ रन बनाउँदै महत्वपूर्ण योगदान दिए। जिम्बाब्वेको सुरुआत राम्रो रहे पनि मध्यम ओभरमा केही दबाब सिर्जना भएको थियो।
श्रीलंकाका बलर दुशान हेमन्तले २ विकेट लिए भने अन्य बलरले पनि कसिलो बलिङ गरे। तर अन्तिम ओभरहरूमा जिम्बाब्वेका ब्याट्सम्यानहरूले धैर्यताका साथ खेल्दै टोलीलाई जिततर्फ डोयाए।
यस जितसँगै जिम्बाब्वे अजेय रहँदै ग्रुप विजेता बन्न सफल भएको हो भने श्रीलंका दोस्रो स्थानमा सीमित रह्यो।
