खरसाङ, (निसं)ः सुधपा टोलको कलभर्ट निर्माणमा कुनै प्रकारको गड़बड़ी पाइएको खण्डमा जानकारी गराउने सभासद् श्याम शेर्पाले जनसाधरणलाई सुझाउ दिएका छन्। जनसाधरणले भोगिरहेका समस्यालाई ध्यानमा राखेर खरसाङ नगरपालिकाको वार्ड नम्बर 9 स्थित सुधपा टोल साथै मन्टिभियट चिया बगानको कार्यलय, दुई नम्बर गाउँ जाने मुख्य बाटोको कल्भर्ट निर्माणको कार्य जीटीएले आरम्भ गरेको हो। यहाँको कलभर्ट विगत वर्षाकालमा क्षतिग्रस्त बनेको थियो भने क्षतिग्रस्त कलभर्टको कारण मानिसहरूले समस्या झेलिरहेका थिए।
क्षेत्रवासीको समस्याको बारेमा जानकारी पाउने बितिकै 28 नम्बर खरसाङ शहर चिम्नी देवराली समष्टि सभासद् श्याम शेर्पाले उक्त क्षेत्रको निरक्षण गरेर जीटीएका मुख्य कार्यपाल अनित थापालाई जानकारी गराएका थिए। सभासद्ले यस समस्याको निम्ति आफ्नो तर्फबाट सक्रिय रुपमा पहल गरेपछि कार्यालयको प्रक्रियाहरू पुरा हुनसाथै कोष जारी गरिएको थियो। कलभर्ट निर्माणको कार्य वर्तमानमा खरसाङ इञ्जिनियरिङ विभागद्वारा भइरहेको छ। 23 जनवरी विधिवत पूजापाठ गरेर आरम्भ गरिएको निर्माण कार्य युद्ध स्तरमा भइरहेको दावी छ।
जनसाधरणको समस्यालाई बुझेर कोष स्वीकृत गरिदिएकोमा सभासद् श्याम शेर्पाले सम्पूर्ण गाउँवासीको तर्फबाट जीटीएका मुख्य कार्यपाल अनित थापालाई धन्यवाद पनि दिएका छन्। सभासद् शेर्पाले कलभर्ट निर्माण कार्यको आफूले समय समयमा निरीक्षण गरेको र ठेकेदार रवीन तामाङले गुणस्तरको कार्य गरिरहेको बताएका छन्।
यस बारेमा सभासद् शेर्पाले भने, सुधपा टोल अनि यो बाटो भएर गाड़ी चलाउने अनि हिँड़ने दुई नम्बर गाउँका मानिसहरूको समस्याको बारेमा जानकारी पाउनसाथै मैले जीटीए मुख्य कार्यपाल अनित थापालाई जानकारी गराएको थिएँ। तिनले कलभर्ट निर्माणको निम्ति विभाग मार्फत कोष जारी गरिदिएपछि कलभर्ट निर्माणको कार्य आरम्भ गरिएको हो। कलभर्ट निर्माणको कार्य सुचारु सञ्चालन गर्नको निम्ति अनि गुणस्तरीय निर्माणको निम्ति सबैले सहयोग गर्न पर्छ। कलभर्ट निर्माणको अवधिभर चालकहरूलाई यहाँबाट गाड़ी नचलाइदिने हाम्रो अपिल छ, निर्माण कार्यको अवधिमा गाड़ी चलाइएको खण्डमा बाटोको निर्माण कार्य राम्रो अनि गुणस्तरीय हुँदैन। निरीक्षणको अवधिमा ठेकेदारले गुणस्तरीय कार्य गरिरहेको पाएका छौँ। यदि ठेकेदारले निर्माण कार्यमा कुनै प्रकारको गड़बड़ी गरेको थाहा पाएको खण्डमा गाउँका हामीलाई जानकारी गराउने अथवा विभागीय अधिकारी समक्ष जानकारी गराउने गाउँका मानिसहरूसित हाम्रो सुझाउ छ।
