राबदेन शेर्पाविरुद्ध यौन शोषण तथा आपराधिक डरत्रास सम्बन्धी आरोपमा सदर पुलीस थानामा एक एफआईआर दर्ता गरिएको छ। पुलीस स्रोतका अनुसार सदर पीएस केस एफआईआर नं. १५/२०२६ मिति ११/०२/२०२६ भारतीय न्याय संहिता, २०२३ का सम्बन्धित धाराअन्तर्गत दर्ता गरिएको हो। उक्त मुद्दाको अनुसन्धानका लागि पुलीस निरीक्षक (PI) अनिल सुब्बालाई जिम्मा दिइएको छ। फेब्रुअरी ११, २०२६ मा दर्ता गरिएको उजुरीअनुसार दुई महिलाले आफूहरू गान्तोकस्थित छुट्टाछुट्टै प्रतिष्ठानमा अभियुक्तका लागि कार्यरत रहेको उल्लेख गरेका छन्।
उजुरीकर्तामध्ये एकजनाले मार्चदेखि अगस्ट २०२५ सम्म तादोङस्थित क्यान्टिनमा सहयोगीका रूपमा काम गरेको बताएकी छन् भने अर्कीले डिसेम्बर २०२४ मा व्यावसायिक पार्किङ स्थल व्यवस्थापन गरेको जनाएकी छन्। उजुरीमा अभियुक्तले आफ्नो अधिकारको दुरुपयोग गर्दै तथा उनीहरूको आर्थिक कमजोर अवस्थाको फाइदा उठाई बिना सहमति पटक–पटक यौन शोषण गरेको आरोप लगाइएको छ। उनीहरूले आपराधिक डरत्रास देखाएको तथा कानुनी पारिश्रमिक नदिएको समेत आरोप लगाएका छन्।
उजुरीकर्ताहरूले डर, मानसिक आघात, सामाजिक कलंक तथा कथित धम्कीका कारण प्रारम्भमा सम्बन्धित निकायमा जान नसकेको बताएका छन् प्रहरीले घटनाबारे अनुसन्धान भइरहेको पुष्टि गरेको छ। हाल यस विषयमा थप विवरण सार्वजनिक गरिएको छैन। स्रोतका अनुसार पीडितलाई प्रहरीमा उजुरी दर्ता गर्न सहयोग गर्न सिक्किम महिला आयोगले पनि हस्तक्षेप गरेको जनाएको छ।
