मार्ताम–राफोंगको नयबीर शिवालयमा महाशिवरात्री सम्पन्न

पश्चिम सिक्किमको गेजिङ जिल्ला अन्तर्गत मार्ताम–राफोंगस्थित नयबीर शिवालय मन्दिरमा यस वर्षको महाशिवरात्री पर्व अत्यन्त श्रद्धा, उत्साह र धार्मिक गरिमाका साथ सम्पन्न भएको छ। नयबीर शिवालय मन्दिर महाशिवरात्रि पूजा समितिका अध्यक्ष लाकु छिरिङको
अध्यक्षतामा आयोजित उक्त कार्यक्रमले सम्पूर्ण क्षेत्रलाई भक्तिमय वातावरणले ओतप्रोत बनाएको थियो।
बिहाननै देखी मन्दिर परिसरमा श्रद्धालु भक्तजनहरूको भीड लागेको थियो। मन्दिर व्यवस्थापन समिति तथा स्थानीय स्वयंसेवकहरूको सक्रिय समन्वयमा पूजा–अर्चना रुद्राभिषेक भजन–कीर्तन तथा धार्मिक प्रवचनका कार्यक्रमहरू सुव्यवस्थित रूपमा सम्पन्न गरिएको हो। भक्तजनहरूले भगवान शिवलाई जल, दूध, बेलपत्र तथा धतुरो अर्पण गर्दै परिवारको सुख, शान्ति र समृद्धिको कामना गरेका थिए। दिनभर उपवास बसेका श्रद्धालुहरूले राति ‘ॐ नमः शिवाय’ मन्त्रको जपसहित जाग्रामसमेत गर्नेछन्।
पूजा–अनुष्ठानको समापन पश्चात् मन्दिर परिसरमै एक महत्वपूर्ण सभा सम्पन्न भयो। सभाले मन्दिरको संरक्षण व्यवस्थापन तथा दीर्घकालीन विकासलाई थप सुदृढ बनाउन नयाँ ‘विकास समिति’ गठन गर्ने सर्वसम्मत निर्णय गरेको छ। नवनिर्मित समितिले मन्दिरको भौतिक पूर्वाधार सुदृढीकरण, स्वच्छता व्यवस्थापन तथा धार्मिक पर्यटन प्रवर्द्धनमा विशेष प्राथमिकता दिने प्रतिबद्धता व्यक्त गरेको छ।
उक्त सभालाई जिल्ला पञ्चायत सदस्य धन माया छेत्रीले अध्यक्षता गरेको थियो साथमा वाणिज्य कर विभागका संयुक्त आयुक्त आर.बी. राई, श्रम विभागका सेवानिवृत्त आयुक्त डी.एस. कुँवर तथा क्षेत्रका अन्य गण्यमान्य व्यक्तित्वहरूको सहभागिता रहेको थियो। अतिथिहरूले आफ्नो सम्बोधनमा धार्मिक स्थलहरूको संरक्षण सामूहिक दायित्व भएको उल्लेख गर्दै स्थानीय समुदायको एकताले नै यस्ता पवित्र धरोहरहरूलाई दिगो रूपमा जोगाउन सकिने धारणा राखे।
महाशिवरात्रिको धार्मिक महत्व
हिन्दू धर्मावलम्बीहरूका लागि महाशिवरात्रि अत्यन्त महत्वपूर्ण पर्व हो, जुन प्रत्येक वर्ष फाल्गुन कृष्ण चतुर्दशीका दिन मनाइन्छ। पौराणिक मान्यताअनुसार यसै दिन भगवान शिव र माता पार्वतीको दिव्य विवाह सम्पन्न भएको विश्वास गरिन्छ, जसलाई शिव–शक्तिको पावन मिलनको प्रतीकका रूपमा लिइन्छ।
आध्यात्मिक दृष्टिले महाशिवरात्रि अज्ञानता र अन्धकारमाथि ज्ञान र चेतनाको विजयको प्रतीक हो। यस दिन गरिएको उपवास, जप, ध्यान र आराधनाले मनोकामना पूरा हुनुका साथै आत्मिक शान्ति प्राप्त हुने धार्मिक विश्वास रहिआएको छ।
यस वर्षको महाशिवरात्रि पर्वले नयबीर शिवालय मन्दिरमा धार्मिक आस्था मात्र नभई सामाजिक एकता र विकासप्रतिको प्रतिबद्धतालाई समेत सुदृढ बनाएको स्थानीयवासीहरूले बताएका छन्।