दार्जीलिङ, १३ फरवरी (निस): अस्पतालको व्यवस्थापनमाथि थुप्रै प्रश्नहरू लिएर दार्जीलिङ जिल्ला अस्पताल पुगेको भाजपा दार्जीलिङ जिल्ला समितिको एक प्रतिनिधि टोली अस्पताल पक्षबाट सन्तोषजनक उत्तर पाउन विफल भयो। अस्पतालका सुपर नै अस्वस्थ रहेको कारण उनलाई धेरै प्रश्नहरू गर्न उचित नलागेको भाजपा दार्जीलिङ जिल्ला समिति अध्यक्ष सञ्जीव लामाले बताएका छन् ।
दार्जीलिङ जिल्ला अस्पतालबाट प्याथोलोजी पुरानो सदर अस्पतालमा सारिएको तर त्यहाँ (प्याथोलोजीमा) हाल बत्ती, पानी केही नरहेको, लामाले दाबी गरे। लालढिकीबाट भुल्दुङमा पानी भरेर ब्लड टेस्ट गरिरहेको कुरा गर्दै उनले धेरै
अघिदेखि बन्द अवस्थामा रहेको एमआरआई मशीनलाई लिएर पनि प्रश्न गरे।
उनले भने, क्याबिन त्यतिकै बन्द गरेर राखिदिएको छ। बेडहरू कम्ती गरिदिएको छ। डाक्टरहरूको कमी छ। केही अघि अस्पतालभित्रै वार्ड मास्टरले अस्पतालकै एकजना
कर्मचारीसित दुष्कर्म गरेको खबर छ। जुन वार्ड मास्टरलाई पुलिसले पक्राउ गरेर पुलिस हिरासतमा छ । निकै महीना अघि अस्पतालका स्टाफले डाक्टरलाई छुरी हानेको घटना छ। लामाले भने, थुप्रै प्रश्नहरू थिए। अस्पतालमा कर्मचारीहरूको पनि सुरक्षा छैन । साधारण जनताको उपचार पनि
ठीक छैन।
दार्जीलिङ जिल्ला अस्पतालको वास्तविकता भिन्नै भइसकेको ठहर गर्दै उनले भने, अस्पताल जीर्ण अवस्थामा छ।
केन्द्र सरकारले स्वास्थ्यको लागि वर्षेनी करोड़ों रूपियाँ आवण्टन गरेको छ। तर यहाँ सबै कुरामा धन्धा भएको छ। कसैको स्वार्थमा एमआरआई मशीन बन्द गरेर राखेको छ। सभासद् अस्पताल आएर नौटंकी गर्नु मात्र हो। एकक्षण भिडियो गरेर हामीले यो गर्दैछौं, भन्नु मात्र हो। त्यहाँदेखिको उता जवाफदेही को हुने ? प्रश्न गर्दै सञ्जीव लामाले भने, आम मान्छेले अस्पतालमा पाउने उपचारहरू पाउनुपर्यो ।
यहाँ डीएम छ, जीटीए छ । दुइवटा सरकार चल्छ । जिम्मेवारी कसले लिने ? लामाले प्रश्न गरे।
