आशा प्यारामेडिकल-नर्सिङ इन्स्टिच्युट दार्जीलिङ शाखामा ताला छ

आशा प्यारामेडिकल अनि नर्सिङ इन्स्टिच्युट, सालबारीमा भएको फर्जीकाण्ड विषय जीटीए किन मौन भनेर प्रश्न उठिरहेको समय, जीटीए सभा डेपुटी चेयरम्यान राजेश चौहान अनि टीमले आज दार्जीलिङमा जिल्ला शासक अनि जिल्ला पुलिस अधिक्षक श्रीमती प्रतिक्षा जारखारियासित भेट गरी जीटीए चिफ अनित थापाकाे पत्र माथि कस्तो कार्यवाही भई रहेको छ, त्यसको जानकारी लिए। पत्र मुख्य सचिव स्वास्थ्य अनि परिवार कल्याण विभाग, पश्चिम बङ्गाल सरकारलाई सम्बोधन गरिएको छ। पत्राचार गरिएको मिति 9 फेब्रुअरी रहेको छ, जुन घटना घटेको समय छेउ हो। पत्रमा दोषी सँस्था विरुद्ध जाँच गर्ने अनि विद्यार्थीलाई न्याय दिने अपील गरिएको छ।
सभासद राजेश चौहानले जानकारी दिए अनुसार जुन दिन फर्जी काण्डलाई लिएर विद्यार्थीहरुले आवाज उठाएका थिए त्यही दिन नै जीटीए चिफले बंगाल सरकार स्वास्थ्य अनि परिवार कल्याण विभागका मुख्य सचिवलाई पत्राचार गरेर घटनामाथि जाँच गर्ने अपील गरेका थिए। चौहानले जनाए अनुसार जीटीए प्रमुख अनित थापाले दार्जीलिङ्ग सीएमओएचलाई संस्था विरुद्ध प्राथामिकि दर्ता गर्ने निर्देश दिएका थिए। सीएमओएचले पनि 9 फेब्रुअरी कै दिन सँस्थामाथि प्राथमिकी दर्ता गरेका थिए। आज जिल्ला पुलिस अधिक्षक सँग सीएमओएचले दर्ता गरेको प्राथमिकी विषय स्टाटस लिएको बताए।
पुलिसले दोषीलाई पक्राउ गरिसकेको छ भने दोषी विरुद्ध कानुनी प्रक्रिया सुर भएको छ।
राजेश चौहानले जानकारी दिए अनुसार संस्थाको दार्जीलिङ्ग शाखाको कार्यालयमा पुलिस प्रशासनले ताला लगाइसकेको छ। चौहानले जीटीए चिफको बयानलाई दोहोर्याउँदै भने, ” जीटीएले आफ्नो प्रभाव क्षेत्र अनि व्यवस्थापन भित्र गर्नु सक्ने कार्य गरिरहेको छ। विद्यार्थीहरूलाई भेट्न जानुभन्दा बढी हामीले उनीहरूको मुद्दालाई प्राथमिकता दिएर प्रशासनिक कार्य गर्यौ। अहिले केस कोर्टमा दर्ता गरिएको छ अनि सम्बन्धित व्यक्तिलाई पुलिसले आफ्नो हिरासतमा लिएको छ। जीटीए कहिले पनि चुप बसेको छैन।”