भारतीय गोर्खा परिसंघद्वारा स्वतन्त्रता सेनानी बाबु छबिलाल उपाध्यायप्रति पुष्पाञ्जली अर्पण गरियो भने सम्मानका लागि असम सरकारप्रति कृतज्ञता व्यक्त गरियो।
बाबु छबिलाल उपाध्याय चोक, दिसपुर, गुवाहाटी, असम : भारतीय गोर्खा परिसंघले बुधबार गुवाहाटी स्थित दिसपुर, असम विधानसभाको नजिक स्वतन्त्रता सेनानी बाबु छबिलाल उपाध्यायको सालिकमा पुष्पाञ्जली अर्पण गरेको थियो। यो श्रद्धाञ्जली परिसंघको ७औँ राष्ट्रिय महाधिवेशन (३० जनवरीदेखि १ फेब्रुअरी २०२६) सफलतापूर्वक सम्पन्न गरी उत्तर प्रदेशको आग्राबाट फर्किएपछि अर्पण गरिएको हो। श्रद्धाञ्जली कार्यक्रममा भारतीय गोर्खा परिसंघका राष्ट्रिय अध्यक्ष नित्यानन्द उपाध्यायको नेतृत्वमा टोली सहभागी भएको थियो। उहाँसँगै राष्ट्रिय उपाध्यक्ष प्रकाश दाहाल, असम राज्य अध्यक्ष अमर अधिकारी, राज्य उपाध्यक्ष गोपाल शर्मा, वर्तमान असम प्रदेश मूल सचिव तथा नवनिर्वाचित राष्ट्रिय मूलसचिव (प्रशासन) श्रीनन्द किराती देवान, तथा राष्ट्रिय परिषद् सदस्य (NCM) रमेश बस्तोला उपस्थित हुनुहुन्थ्यो। परिसंघले औपचारिक वक्तव्य जारी गर्दै असम सरकार तथा माननीय मुख्यमन्त्री डा. हिमन्त बिस्व शर्माप्रति हार्दिक कृतज्ञता व्यक्त गरेको छ। वक्तव्यमा भनिएको छ कि स्वतन्त्रता सेनानी बाबु छबिलाल उपाध्यायजस्ता ऐतिहासिक व्यक्तित्वलाई सम्मान गर्नु गोर्खा जातिको गौरवसँग जोडिएको विषय हो र यसले भारतको स्वतन्त्रता संग्राममा असमेली गोर्खाहरूको योगदानलाई राष्ट्रिय स्तरमा स्थापित गरेको छ। परिसंघले यस कार्यलाई “राष्ट्रभरिका गोर्खाहरूको सम्मान”को रूपमा लिएको जनाएको छ।
३१ जनवरी २०२६ का दिन माननीय मुख्यमन्त्री डा. हिमन्त बिस्व शर्माले दिसपुरमा बाबु छबिलाल उपाध्यायको सालिक अनावरण गर्नुभएको थियो। उक्त कार्यक्रममा राजनीतिक नेताहरू, सामाजिक अगुवाहरू, तथा गोर्खा जातीय संस्थाका नेतृत्व र प्रतिनिधिहरूको उल्लेखनीय उपस्थिति रहेको थियो।
मुख्यमन्त्री शर्माले बाबु छबिलाल उपाध्यायलाई “एक महान गोर्खा राजनेता तथा साहसी स्वतन्त्रता सेनानी”को रूपमा स्मरण गर्दै उहाँको जीवन राष्ट्रसेवा, साहस र समर्पणको प्रतीक भएको बताउनुभयो। उहाँले भारतको स्वतन्त्रता आन्दोलनमा उपाध्यायको योगदान तथा असमको सामाजिक–राजनीतिक इतिहासमा उहाँले खेलेको भूमिकालाई विशेष रूपमा उल्लेख गर्नुभयो।
बाबु छबिलाल उपाध्याय (१८८२–१९८०) असमबाट भारतको स्वतन्त्रता आन्दोलनमा सक्रिय एक प्रमुख नेता हुनुहुन्थ्यो। उहाँ असम प्रदेश कांग्रेस कमिटीका प्रथम अध्यक्ष हुनुका साथै असहयोग आन्दोलनमा अग्रणी भूमिका निर्वाह गर्नुभएको थियो। उहाँले समाजिक एकता, शिक्षा प्रवर्द्धन, तथा विभिन्न समुदायबीच सद्भाव कायम गर्न उल्लेखनीय योगदान दिनुभएको थियो। दिसपुरमा उहाँको सालिक स्थापना तथा आज अर्पित श्रद्धाञ्जलीले उहाँको योगदानलाई पुनः स्मरण गराउँदै उहाँलाई साहस, एकता र निःस्वार्थ राष्ट्रसेवाको प्रतीकका रूपमा भावी पुस्तासम्म स्थापित गर्ने विश्वास गरिएको छ।
