डा. किङ्ग गुनु घर्तीको आसामे गायन टोलालाई जनाइयो स्वागत

बाघडुग्रामा आयोजित पाँचदिने गोर्खा मेलाको समापन कार्यक्रममा मिजोरमका डा. किङ्ग गुनु घर्ती र उनकोे टोलीमा रहेका आसामका गायन कलाकारहरूलाई स्वागत जनाइएको थियो। जसमा गोर्खा गौरव संस्थानको पहलमा यो टोलीलाई स्वागत जनाइएको थियो। उक्त टोली डा. किङ्ग गुनु घर्तीद्वारा लिखित अनि डुप्छेन लामाद्वारा सङ्गीतवद्ध हिन्दी र नेपाली गीतहरूको रेकर्डिङ्ग गर्न मिरिक आएको थियो। ती गीतहरूको रेकर्डिङ्ग सफलतापूर्वक गरिएको थियो।
मिरिकको क्रिस्टल अडियो रेकर्डिङ्ग स्टुडियोमा रेकर्डिङ्ग गरिएको हिन्दी गीतहरूको अलबम “बेवफा” र नेपाली गीतहरूको अलबम “मायालु”को नामले प्रसार हुनेछ।
भारतीय नेपाली कला अनि साहित्यमा मिजोरमका पर्याय डा. किङ्ग गुनु घर्तीले यसपटकको अलबमका लागि आसामका गायक-गायिकालाई लिएका छन्।
जसमा आसामको गुवाहाटीबाट सुष्मिता शर्मा र डोल्मा लामा, धेमाजी, शीला पत्थरबाट हरि नेवार, कुमारी कार्की, कामरुपबाट, मनु बराल निकासीबाट रहेका छन्। यी कलाकारहरूलाई नै गोर्खा मेलाको समापन कार्यक्रममा स्वागत जनाइएको थियो।
अर्कोतिर सङ्गीतकार डुप्छेन लामाले छोटो अवधिमा डा. किङ्ग गुनु घर्तीद्वारा लिखित हिन्दी र नेपाली तीसवटा गीतहरूमा सङ्गीत भरिसकेका छन् भने अझ छोटो अवधिमा पचास पुराउने लामाले बताएका छन्। आफुहरू भारतीय नागरिक भएकाले हिन्दी भाषाप्रति पनि प्रेम रहेकोले हिन्दी अलबम पनि निर्माण गरिरहेको डा. किङ्ग गुनु घर्तीले बताएका छन्। स्मरण रहोस् डा. किङ्ग गुनु घर्तीद्वारा अङिलेसम्म सात सय नेपाली अनि दुइसयभन्दा बढी हिन्दी गीतहरू निर्माण गरिसकेका छन्। जुन गीहरू चर्चित कलाकारहरूले गाइरहेका छन् भने नव प्रतिभाहरूलाई पनि मौका दिइरहेका छन्।