खरसाङ, (निसं)ः खरसाङ शहर चिम्नी देवराली समष्टिका सभासद् श्याम शेर्पाले अखिल भारतीय विध्यार्थी महासंघका प्रतिनिधिहरूको साथमा माध्यमिक परीक्षा दिने विद्यार्थीहरूलाई कलम अनि मिठाई वितरण गरे। सोमवार मध्यमिक परीक्षाको पहिलो दिन सभासद अनि विद्यार्थी महासंघका प्रतिनिधिहरूले प्रत्येक परीक्षा केन्द्रमा पुगेर विद्यार्थीहरूलाई कलम अनि मिठाई वितरण गरेका हुन्।
कलम अनि मिठाई वितरणको कार्यक्रममा सभासद् श्याम शेर्पाको साथमा विद्यार्थी महासंघका खरसाङ महकुमा उपसभापति प्रशान्त शर्मा, खरसाङ महाविद्यालयका समन्वयक हिमाल खवास, अध्यक्ष आयुष छेत्री, दार्जीलिङ पोलेटेक्निस संस्थानका अध्यक्ष संस्कार छेत्री अन्य प्रतिनिधिहरू डेविस छेत्री, दयाराम शर्मा, देवाशीष जोसी सामेल थिए।
पहिलो दिनको परीक्षा लेख्न आएका विद्यार्थीहरूलाई यसरी कलम अनि मिठाई वितरण गर्नुको उद्देश्य परीक्षाको पहिलो दिन विद्यार्थीहरूमा रहेको तनाउको स्थितिलाई कम गर्नु र प्रोत्साहन प्रदान गर्नु हो भनी सभासद् श्याम शेर्पाले बताए। तिनले भने, हामी सबैलाई थाहा छ, परीक्षाको पहिलो दिन मनमा एक प्रकारको डर रहन्छ। धेरै विद्यार्थीहरू यस दिन मानसिक तनाउमा रहने गर्छन्। विद्यर्थीहरूलाई यसरी परीक्षाको पहिलो दिन एउटा कलम भए पनि उपहार दिएर मिठाई दिइ भलाकुसारी गर्दा उनीहरूको मन-मस्तिष्कबाट तनाउ हटेर जानेछ भन्ने हामीलाई विश्वास छ। अहिले प्रतिस्पर्धाको युग हो, विद्यार्थीहरूले यस प्रतिस्पर्धाको युगमा राम्रो अंक ल्याएर परीक्षा उत्तीर्ण गर्न आवश्यक छ, यस प्रकारको प्रोत्साहनले यस दिशामा केही टेवा मिल्छ भन्ने हाम्रो विश्वास पनि छ।
