दार्जीलिङ, 25 जनवरी (निसं): दार्जीलिङ घुम्न आएका पञ्जाबका पाँचजना पर्यटक कुटपिटको आरोपमा पक्रा परेका छन्। प्राप्त जानकारीअनुसार गाड़ी घुमाउने विषयलाई केन्द्र गरेर स्थानीय एकजना वाहन चालकसँग विवाद हुँदा ती पर्यटकमध्ये एकजनाले धारिलो हतियारले आक्रमण गरेको आरोप छ। यस घटनापछि क्षेत्रमा सनसनी फैलियो। विभिन्न सूत्रले बताएअनुसार, पञ्जाबबाट आफ्नै वाहन लिएर दार्जीलिङ घुम्न आएका पाँचजनाको पर्यटक समूहको दार्जीलिङको सिंहमारी नजिक फाटक क्षेत्रमा गाड़ी घुमाउने क्रममा स्थानीय एकजना वाहन चालकसँग झगड़ा भयो। प्रत्यक्षदर्शीहरूले बताएअनुसार, तीव्र वादविवादपछि कुटाकुट पनि भयो। त्यसै क्रममा पर्यटकहरूम ध्ये एकजनाले गाड़ीबाट धारिलो हतियार निकालेर स्थानीय वाहन चालकको औंलामा प्रहार गरेको आरोप छ।
घाइते चाकलले घटनाबारे वाहन चालकहरूको संगठनलाई जानकारी दिए। ‘त्यसपछि दार्जीलिङ सदर थाना पुलिस घटनास्थल पुग्यो अनि पाँचैजना पर्यटकलाई पक्राउ गर्यो। पुलिस सूत्रले बताएअनुसार अभियुक्त पाँच पर्यटक पञ्जाबको चण्डीगढ़का वासिन्दा हुन्। पक्रा पर्ने पर्यटकहरूको नाम सुकजीत
सिंह, लखिन्दर सिंह, हर्षबिन्दर सिंह, परबेन्द्र सिंह र मनदीप सिंह हुन्।शनिवार तिनीहरूलाई दार्जीलिङ जिल्ला न्यायालयमा पेश गरियो। दार्जीलिङका अतिरिक्त पुलिस अधीक्षक (सदर) धीरज दासले भने, गाड़ी घुमाउने विषयमा पर्यटक र स्थानीय गाड़ी चालकहरूबीच विवाद भएको हो। पर्यटकहरूविरुद्ध धारिलो हतियार प्रयोग गरी आक्रमण गरेको आरोप छ। एफआईआरको आधारमा पाँचजनालाई पक्राउ गरिएको हो।
