खरसाङ, (निसं): खरसाङ नगरपालिका क्षेत्रको विभिन्न ठाउँमा फोहोर-मैला थुप्रिएकोले दुर्गन्ध संगै जनमानसले विभिन्न समस्या भोगिरहेका छन् भने पर्यटकीय दृष्टिकोणले पनि खरसाङ्को विभिन्न ठाउँमा थुप्रिएको फोहोर-मैलाले नकारात्मक प्रभाव परिरहेको छ।खरसाङ्मा हिमालय दर्पणसित बोल्दै कतिपय सचेत नागरिकहरूले जनाए अनुसार, खरसाङ नगरपालिका क्षेत्र सहित अन्य विभिन्न संग्लग्न क्षेत्रहरूमा पनि फोहोर-मैलाको थुप्रो सड़क किनारमा वा सड़क किनारको झोड़ाहरूमा देखिन्छ।
खरसाङ्को धोबी खोलामा, चन्दन नर्सरी नजिक रेलवे लाइनको किनारमा साथै शहरको अन्य ठाउँहरूमा विगत धेरै समयदेखि फोहोर-मैला जमा भएर बसेकोले स्थानीय मानिसहरू सहित उक्त क्षेत्रमा विभिन्न कामले आएका मानिसहरूले समस्या भोग्नु परिरहेका छन्। थुप्रिएको फोहोर-मैलाले क्षेत्रमा विभिन्न रोगहरू फैलिने सम्भावना बनेको छ भने यसले बाहिरबाट खरसाङ घुम्न आउने पर्यटकहरूमा पनि नकारात्मक प्रभाव परेको छ।
तिनीहरूले थप जनाए अनुसार, यसरी खरसाङ क्षेत्रको मूल सड़क किनारमा फोहोर मैला प्रायः सधैँ देखिनुले स्थानीय प्रशासनको के-कति क्षमता रहेको छ भन्ने कुरोको अड़कल लगाउन सकिने छ। सम्बन्धित निकायले वा प्रशासनले खरसाङ वरिपरि क्षेत्रका विभिन्न ठाउँमा थुप्रिएको फोहोर-मैला उठाउनु मात्र होइन् तर अबोप्रन्त बिहान-बेलुकी दुई समयमा नै सफाई गर्ने प्रबन्ध मिलाउ आवश्यक छ।
खरसाङ धोबी खोला तर्फ चन्दन नर्सरी नजिक रेलवे लाइनको किनारमा धेरै अघिदेखि फोहोर-मैला थुप्रिएकोले विश्व विरासत सानो रेलको मर्यादामा पनि नराम्रो असर पारिरहेको छ भने दार्जीलिङ पहाड़मा घुम्न आउने पर्यटकहरूमा यसले नकारात्मक तस्वीर दार्जीलिङ पहाड़को बनेको छ। सम्बन्धित निकायले उक्त विषयलाई गम्भीरता पूर्वक लिँदै फोहोर-मैलाको व्यस्थापनमा उचित पाइल चाल्न अति आवश्यक रहेको छ।
