T20 विश्वकप 2026 मा बांग्लादेशको बदली स्कटल्याण्ड आउने

अन्तर्राष्ट्रिय क्रिकेट परिषद् (ICC) ले भारतमा आयोजना हुने T20 विश्वकप 2026 मा बांग्लादेशको सहभागिताबारे कडा चेतावनी दिएको छ। बांग्लादेश क्रिकेट बोर्ड (BCB) ले सुरक्षा कारण देखाउँदै भारतमा टोली पठाउने विषयमा आपत्ति जनाएपछि यो विवाद सुरु भएको हो। बांग्लादेश सरकारले पनि टोलीको सुरक्षाबारे चिन्ता व्यक्त गर्दै वैकल्पिक स्थलको माग गरेको थियो, तर ICC ले स्वतन्त्र सुरक्षा मूल्यांकनका आधारमा भारतमा खेल आयोजना गर्न कुनै गम्भीर खतरा नरहेको निष्कर्ष निकाल्दै स्थल परिवर्तनको माग अस्वीकार गर्‍यो। यसपछि ICC बोर्ड बैठकमा बांग्लादेशलाई स्पष्ट रूपमा भनियो कि प्रतियोगिताको तालिका र स्थल परिवर्तन सम्भव छैन। ICC ले BCB लाई एक दिनको अन्तिम समयसीमा दिँदै भारतमा यात्रा गर्ने वा नगर्ने निर्णय तुरुन्त जानकारी गराउन निर्देशन दियो। यदि बांग्लादेशले भारतमा खेल्न अस्वीकार गर्‍यो भने, ICC ले उनीहरूको स्थान अर्को योग्य टोली, सम्भावित रूपमा स्कटल्याण्ड, ले लिने स्पष्ट संकेत गरेको छ। हालसम्म बांग्लादेशको आधिकारिक अन्तिम निर्णय नआएकाले T20 विश्वकप 2026 मा उनीहरूको सहभागिता अनिश्चित अवस्थामा रहेको थियो। अहिले BCB ले भारत नआउने निर्णय सुनाएको छ। अब यो स्थानमा स्कटल्याण्डले मौका पाउनेछ।