भोगोप्रमोको सभामा मैनबत्ती जलाइयो

पङ्खाबारी, (सुवास छेत्री): भारतीय गोर्खा प्रजातान्त्रिक मोर्चा केन्द्रिय समिति सदस्य सन्तोष तामाङले सोमवार गाडीधुरामा आयोजित पार्टीको पङ्खाबारी लङ्भ्यू अम्बटे समष्टिको सभामा यसपालीको विधानसभा चुनाउमा पार्टीको चुनाउ चिन्ह मोमबत्ती बालेर जीतको कामना गरे औ यसपालीको चुनाउमा पार्टीलाई बहुमतले विजयी बनाएर पठाउने आग्रह गरे। गाडीधुरा सार्वजनिक भवनमा सम्पन्न सभामा तामाङले खरसाङ विधानसभा चुनाउमा पार्टीले केन्द्रिय महासचिव अमर लामालाई उम्मेदवारिता दिने निर्णय लिएको भन्दै उनलाई भारी मतले विजयी बनाउने आग्रह गरे। तिनले मोमबत्तीले आफू जलेर अरूलाई उज्यालो दिन्छ भन्दै अग्निले अरूको भोक समेत मेट्ने बताउँदै यसको धेरै महत्वपूर्ण योगदान रहेको जनाउँदै भारतीय गोर्खा प्रजातान्त्रिक मोर्चा अनि यसका अध्यक्ष अनित थापा आफू गलेर भएपनि अरूको दुःख टार्नै, अरूको सहयोग र सेवामा हरदम तत्पर रहने भएकोले यसपल्ट विधानसभा चुनाउमा पार्टीको आफ्नो चुनाउ चिन्ह मोमबत्तीमा भोट हालेर जिताउने सबैसित अपिल गरे। अब यो मोमबत्ती प्रत्येक घर-घरममा बल्नुपर्छ भन्दै तामाङले हामीले कसैलाई कुनै प्रकारको दोषारोपण गरेर अथवा होँचो देखाएर होइन तर आफ्नो असल कर्मले सबैको मन जितेर भोटको निम्ति जनता समक्ष जाने आग्रह गरे।