भुजेल कल्याण संगठन पश्चिम बङ्गालको तत्वावधानमा आयोजना गरिएको “प्हुगाल ब्रोवो नेक १२४३ एवं माघे संक्रान्ति समारोह” टिस्टा दोभान छेउ, प्हुगाल रेली खोलामा शुक्रबार भव्य रुपमा सम्पन्न भयो। यसै अवसरमा सन्त कुमार भुजेल (बलिक्पा) द्वारा लिखित पुस्तक “भुजेल भाषा र खार्पा लिपि” को विमोचन गरियो।
सन्त कुमार भुजेलद्वारा नै सन्चालित अनलाइन भुजेल कविता लेखन तथा वाचन प्रतियोगिताको पनि परिणाम पनि घोषणा गरियो। प्हुगाल खोक न्हेचिलिङ परिसरमा खरो डीबी खवासको अध्यक्षतामा सम्पन्न भएको यस कार्यक्रम फोह्रोपाहरुद्वारा न्हेचिलिङमा पुजाआजाबाट शुरू गरियो। यसपछि ह्याक्मा उर, फुइगोइ, किम खोइ, सिमगोइ, ब्हरेसको फुलौरो फल फुल इत्यादि सबैलाई वितरण गरियो। सुरुक शाखाबाट मादले गीत र नृत्यहरु अनि यागंमाकुम शाखाबाट पनि दुईवटा नृत्यहरु प्रस्तुत गरियो।
सबैको उपस्थितिमा “भुजेल भाषा र खार्पा लिपि” पुस्तक लोकार्पणपछि अनलाइन भुजेल कविता लेखन एवं वाचन प्रतियोगिताको पनि परिणाम घोषणा गरियो। जसमा प्रथम छेनामाय भुजेल, सालाङदाङ सिक्किम, दोस्रो दिपीना भुजेल, सालाङदाङ सिक्किम अनि तेस्रो फोह्रोपा प्रमोद खवास, दार्जीलिङ, पश्चिम बङ्गाल। यी विजेताहरूलाई नगद पुरस्कार ८०००/-, ५०००/- अनि ३०००/- साथै मायाको चिनो अनि प्रमाण पत्र पनि प्रदान गरियो। चौथो र पाँचौं स्थान ओगट्न सफल भएका प्रतियोगिहरूलाई पनि मेमेन्टो अनि प्रमाण पत्र प्रदान गरियो।
समारोहमा अखिल सिक्किम भुजेल संघका उपसभापति डीआर भुजेल, महासचिव डा. विष्णु उमारा भुजेल, फोह्रोपा बाबुकाजी भुजेल, लेखक सन्त कुमार भुजेल, अन्य आपुलम अनि अबाइलमको उपस्थिति रहेको थियो। भुजेल कल्याण संगठनका सल्लाहकारद्वय प्रा. मनिन्द्र भुजेल, डा. आरबी भुजेल, त्यसरी नै तराई डुवर्स भुजेल उत्थान समितिबाट कार्यकारी सदस्य रतन भुजेल अनि फोह्रोपा बाबुकाजी भुजेलको सहभागिता रहेको संगठनको पक्षबाट भीम भुजेलबाट जानकारी पाइएको छ।
