दार्जीलिङ,17 जनवरी(निसं): दार्जीलिङ शहर नजिक बोटानिकल गार्डन फुलबारी केही तल इस्टनथल चियाबारी (पात्री कमान)-मा गत राती 12:47 बजी चितुवा गाउँमा डुलिरहेको सीसी टीभी फुटेज सार्वजनिक भएपछि क्षेत्रबासीमा निकै आतंक फैलिएको छ भने त्यस क्षेत्रमा सुरक्षा व्यवस्थाको निम्ति सम्बन्धित निकायहरूलाई गाउँवासीले अनुरोध गरेका छन्।
गाउँका मानिसहरूलाई घरदेखि बाहिर ननिस्किने पनि सतर्कताको सन्देश प्रसार गरिएको छ। यसरी अचानक सीसी टीभी फुटेजमा गाउँभित्र चितुवा पसेको देखेपछि मानिसहरुले विभिन्न प्रकारको भयपूर्ण अन्दाज लगाउन थालेका छन्। गाउँका राजेश राईको जानकारी अनुसार गत राति लगभग 12:47 बजीतिर गाउँकै एकजना मानिसको घरको सीसीटीभी-मा निकै ठूलो चितुवा डुलिरहेको रेकर्ड भएको यस प्रकारको सीसी टीभी फुटेज-लाई सार्वजनिक गरिएको छ।
उनले भने, यसभन्दा अघि गाउँमा कसैकसैले चितुवा देखेको कुराहरू गर्थे तर यस घटनालाई साधारण रुपमा लिइएको थियो, अब भने सीसीटीभी फुटेजले त्यस प्रकारको घटनालाई स्पष्ट प्रमाण गरेकोछ कि गाउँमा रातको समय चितुवा आउने गर्दोरहेछ उनले अझ भने, यसरी सीसीटीभी फुटेजमा चितुवा गाउँमा आएको देखिए पनि गाउँ घरमा अहिलेसम्म कुनै प्रकारको दुर्घटना भएको छैन, तर अब गाउँलेहरू सचेत हुनुपर्ने अवस्था आइपुगेको छ।
