खरसाङ, (निसं)ः गोर्खाल्याण्ड क्षेत्रीय प्रशासन (जीटीए) को सूचना एवं सांस्कृतिक विभागद्वारा आगामी 11 जनवरीमा सालबारीस्थित मेथीबारीको जनहित समाज भवनमा पुरस्कार अलङ्करण समारोह आयोजना हुने जानकारी जीटीएका सूचना एवं सांस्कृतिक विभागका सहनिर्देशक विमल राईबाट पाइएको छ।
तिनले जनाए अनुसार उक्त पुरस्कार अलङ्करण समारोहमा साहित्यिक क्षेत्रका महान् विभूतिहरूको नाममा प्रत्येक वर्ष प्रदान गरिने अगावै घोषणा गरिएका पुरस्कारहरू गिरी पुरस्कार 2025, शिव कुमार राई पुरस्कार 2025 अनि हायमनदास राई किरात पुरस्कार 2025 प्रदान गरिने छ। जसमा कला, साहित्य सहित विभिन्न क्षेत्रमा महत्वपूर्ण योगदान पुऱ्याएका यी पूर्व घोषित पुरस्कारहरू प्रदान गरिनेछ।
जसमा गिरी पुरस्कार 2025 साहित्य विधा अन्तर्गत राजु प्रधान हिमांशुलाई, संगीत विधामा सुरेशकुमार छेत्रीलाई, शिवकुमार राई पुरस्कार 2025, साहित्य विधामा शमशेर अलीलाई प्रदान गरिनेछ भने हायमनदास राई किरात पुरस्कार 2025, साहित्य विधा (आख्यान) मा समीर राई शान्तिलाई प्रदान गरिनेछ।
यसको अतिरिक्त गत 29 दिसम्बर 2025 को दिन मास्टर मित्रसेन थापाको 130 औँ जन्म दिवस पालन गर्दै दार्जीलिङ गोर्खा रङ्गमञ्च भवनमा मास्टर मित्रसेन थापा पुरस्कार 2025- ले लोकप्रिय गायक इन्द्रजीत मिजारलाई अलङ्करण गरिएको छ।
जुन प्रकारले रक सङ्गीतको माध्यमले अनि आफ्नो उत्कृष्ट प्रस्तुतीले अन्तर्राष्ट्रिय स्तरसम्म नेपाली भाषा अनि सङ्गीतप्रति योगदान पुऱ्याएको मन्त्र व्याण्डलाई पनि पुरस्कारले सम्मानित गरिनेछ भने समारोहमा अन्य विभिन्न पक्षहरूमा घोषणा पनि हुने सम्भावना रहेको छ। कार्यक्रममा विभिन्न संघ-संस्थाका प्रतिनिधिहरू, व्यक्ति विशेष संगै जीटीएका अधिकारीहरू, प्रतिनिधिहरू सहित प्रमुख अतिथिको रूपमा जीटीए प्रमुख कार्यपाल अनित थापाको उपस्थिति रहने छन्।
