सांसद राजु विष्ट सपरिवार थिएटर पुगे फिल्म ‘धमिलो पहाड’ हेर्न

दार्जीलिङका सांसद राजु विष्ट आइतबार सपरिवार सिलगडीस्थित थिएटरमा चलचित्र ‘धमिलो पहाड’ हेर्न पुगेका थिए। दर्शकहरूको उल्लेख्य उपस्थिति र खचाखच भरिएको हलबीच चलचित्र प्रदर्शन अघि एक औपचारिक कार्यक्रमसमेत आयोजना गरिएको थियो। नेपाली चलचित्र ‘धमिलो पहाड़’-को विशेष स्क्रिनिङमा मुख्य अतिथिको रूपमा निम्त्याइएको भए तापनि एक दर्शकको रूपमा त्यहाँ उपस्थित हुन पाउँदा आफूलाई धेरै खुशी लागेको, गोर्खा समुदायको व्यथा-कथालाई सिनेमाको पर्दामा उतार्ने जमर्को गरेका हाम्रा उत्साही नेपाली सिने निर्माता टोली अनि यससँग संलग्न सबै कलाकार एवम् सिने-कर्मीहरूप्रति कलाकारहरूप्रति गर्व अनुभव भएको विष्टले बताए।
गोर्खा समुदायको व्यथा-कथालाई लिएर आजपर्यन्त ओझेलमा रहेको इतिहास अनि सच्चाइलाई प्रभावशाली ढङ्गले सिनेमाको पर्दामा उतारेर ‘ओखली-ढिकी’ टीमले यस विधामा एउटा महत्त्वपूर्ण योगदान गरेको छ। विशेषगरी दार्जीलिङ पहाड़, तराई अनि डुवर्स क्षेत्रका गोर्खाहरूको ऐतिहासिक व्यथा र महत्त्वपूर्ण घटनाहरूलाई उज्यालोमा ल्याउने अनि हाम्रा कथाहरूलाई मुख्य धारामा ल्याउने ठूलो चुनौती स्वीकार गरेको छ जसका लागि सम्पूर्ण टीम वधाइको पात्र छ। सांसद विष्टले सबै दर्शकहरूलाई नजिकको सिनेमा हलमा गएर यो फिल्म अवश्य हेर्न आह्वान गरे।