खरसाङ, (निसं): वाणिज्य एवं उद्योग मन्त्रालय भारत सरकार अधीनस्थ रहेको टी बोर्ड इण्डियाद्वारा टी डेभलपमेन्ट एण्ड प्रमोसन स्किम 2025-2026 अन्तर्गत खरसाङ्को सिटोङ 1 मा रहेको सिटोङ अर्ग्यानिक स्मल टी ग्रोवर्स वेलफेयर सोसाइटी संस्थालाई दार्दीलिङ क्षेत्रीय टी डेभलपमेन्ट अधिकारी फुरी शेर्पाले चिया कृषिमा प्रयोग गरिने आवश्यक उपकरण अनि सामानहरू उपलब्ध गराएका छन्। यसमा टी हार्भेस्टर, पर्निङ मशीन, पावर स्प्रे, ब्रस कटर, वेजिङ स्केल, प्लास्टिक क्रेट आदि उपकरणहरु रहेका छन्।
लगभग 1.5 लाख रुपियाँ मूल्यको उपकरणहरु यस योजना अन्तर्गत सिटोङ्का साना चिया उत्पादक संस्थालाई उपलब्ध गराए वापत सिटोङ अर्ग्यानिक स्मल टी ग्रोवर्स वेलफेयर सोसाइटीका सभापति विश्वास लामा अनि सचिव विकास राईले संस्थाको तर्फबाट उक्त सरकारी विभाग एवं डेभलपमेन्ट अधिकारी फुरी शेर्पाप्रति कृतज्ञता प्रकट गरेका छन्। चिया कृृषिमा लागिपरेका साना चिया उत्पादक कृषकहरुलाई सरकारी योजना अनुरुप सरकारी सहुलियत र सुविधाहरु निरन्तर रूपमा उपलब्ध गराइने गरेको शेर्पाले बताए।
यी सहुलियत र सुविधाहरुको लाभ प्राप्त गर्नका निम्ति कृृषकहरुले टी बोर्ड इण्डियामा आधिकारिक रूपमा आफ्नो नाम र कृषिको सरकारी पञ्जीकरण गराएको हुनु पर्नेछ भनी शेर्पाले बताउदै चिया कृषिमा संलग्न रहेका कृषकहरुलाई सरकारी प्रक्रिया अनुरुप आधिकारिकरूपमा आफ्नो नाम र कृषिलाई टी बोर्ड इण्डियामा पञ्जीकरण गराउने थप सुझाव पनि तिनले दिएका छन्।
