सिटिजन एक्सन पार्टी–सिक्किम महिला परिषद् नाम्चीको कार्यकारी समितिको समन्वय सभा नाम्ची पार्टी कार्यालयमा मंगलबार सम्पन्न भयो। सभाको क्रममा पार्टीकी महिला परिषद् उपाध्यक्ष प्रभारी श्रीमती सुमती छेत्रीले राज्यमा महिलाको सुरक्षा सुनिश्चित गर्न सरकार पूर्ण रूपमा असफल भएको स्पष्ट बताइन्। उनले महिलाहरूको अधिकार अनि सुरक्षाको विषयमा यति कमजोर र लाचार सरकार सिक्किमले अहिलेसम्म नदेखेको उल्लेख गरिन्। आज आम नागरिक असुरक्षित छन्, राज्यको सम्पत्ति खुलेआम बिक्री भइरहेको छ, अनावश्यक ऋणको बोझ जनतामाथि थोपरिएको छ, नेपोटिजम चरम सीमामा पुगेको छ अनि राज्यको अर्थतन्त्र डामाडोल बनाइएको अवस्थामा पनि सत्ताधारीहरू मौजमस्तीमा व्यस्त रहेको उनको भनाइ थियो। श्रीमती छेत्रीले
मुख्यमन्त्रीबाट खुलेआम धम्की दिई प्रजातन्त्रको हनन भइरहेको आरोप लगाउँदै, सिटिजन एक्सन पार्टी–सिक्किमका सम्पूर्ण महिलाहरू एकजुट भई अन्यायविरुद्ध विद्रोह गर्ने अनि राज्य तथा राज्यवासीको हितका लागि अन्तिम क्षणसम्म संघर्ष गर्ने आह्वान पनि गरिन्।
सभामा सिटिजन एक्सन पार्टी–सिक्किमलाई अझ मजबुत बनाउने, संगठन विस्तार गर्ने तथा महिला नेतृत्वलाई सक्रिय बनाउने विषयमा व्यापक छलफल भयो। यस समन्वय सभामा पार्टीकी महिला परिषद् उपाध्यक्ष प्रभारी श्रीमती सुमती छेत्री, कार्यकारी उपाध्यक्ष प्रभारी श्रीमती सन्जु राई, महिला परिषद्की अध्यक्ष श्रीमती बिना शर्मा, महासचिव अर्पणा राई, युवा उपाध्यक्ष इडु भुटिया, नाम्ची जिल्ला महिला परिषद्की अध्यक्ष श्रीमती हेलेन राईलगायत नाम्ची जिल्लाअन्तर्गतका ६ वटै इकाइका महिला परिषद्का अध्यक्ष, सचिव तथा विभिन्न पदमा रहनुहुने महिला नेतृहरूको उल्लेखनीय उपस्थिति रहेको थियो। सभाले महिलाको सुरक्षा, अधिकार र सम्मानका लागि सिटिजन एक्सन पार्टी–सिक्किम महिला परिषद् अझ सशक्त रूपमा अघि बढ्ने निर्णय गर्दै कार्यक्रम सफलतापूर्वक सम्पन्न भएको पार्टीकी महिला परिषद् महासचिव अर्पणा राईले जानकारी दिएकी छिन्।
