इंग्लिस प्रिमियर लिगअन्तर्गत आइतबार सम्पन्न खेलमा एस्टन भिल्लाले म्यानचेस्टर युनाइटेडलाई २–१ ले पराजित गर्दै शीर्ष तीन स्थानमा आफ्नो दाबी अझ मजबुत बनाएको छ। यस जितसँगै भिल्ला उपाधि होडमा समेत मजबुत दाबेदारका रूपमा उभिएको छ। भिल्ला पार्कमा भएको खेलमा घरेलु टोलीका लागि मोर्गन रोजर्सले उत्कृष्ट प्रदर्शन गर्दै दुवै गोल गरे। युनाइटेडका तर्फबाट म्याथेस कुन्हाले एक गोल फर्काए पनि टोलीलाई हारबाट जोगाउन सकेनन्।
यो नतिजासँगै एस्टन भिल्लाले सबै प्रतियोगिता जोड्दा लगातार दशौं जित दर्ता गरेको छ। १७ खेलबाट ३६ अंक जोडेको भिल्ला तालिकाको तेस्रो स्थानमा छ। शीर्ष स्थानमा रहेको आर्सनलसँग उसको दूरी तीन अंकको मात्र रहेको छ। आर्सनलको ३९ अंक छ भने दोस्रो स्थानमा रहेको म्यानचेस्टर सिटीले ३७ अंक संकलन गरेको छ।
