दार्जिलिङ पहाडमा ३१३ जना शिक्षकहरूको नियुक्ति तथा नियमितीकरणसम्बन्धी मुद्दामा माननीय कलकत्ता उच्च न्यायालयबाट आएको फैसलाप्रति गोर्खा यूथ एक्टिभिस्ट नेटवर्क (ज्ञान) ले आफ्नो धारणा सार्वजनिक गरेको छ।
ज्ञानका अनुसार उक्त फैसला लामो समयसम्म चलेको कानुनी प्रक्रियाको परिणाम हो, जसमा विभिन्न चरणका सुनुवाइ, अभिलेखहरूको सूक्ष्म परीक्षण, दस्तावेजी प्रमाणहरू तथा सबै पक्षका तर्कहरू समेटिएका छन्। संगठनले कुनै पनि व्यक्ति वा संस्था कानुनभन्दा माथि हुन नसक्ने सिद्धान्तलाई दोहोर्याउँदै, न्यायालयका फैसलाहरू कठिन र पीडादायी भए पनि तिनको सम्मान गरिनुपर्ने उल्लेख गरेको छ।
फैसलाका कारण प्रभावित शिक्षकहरू तथा तिनका परिवारले भोग्नुपर्ने मानसिक र आर्थिक पीडाप्रति ज्ञानले संवेदना व्यक्त गरेको छ। संगठनले यदि कुनै वास्तविक नियुक्ति प्राप्त शिक्षकमाथि अन्याय भएको ठहर भएमा, ५२ पृष्ठको फैसलामै उच्च न्यायालयको बेञ्चमा अपिल गर्न सकिने कानुनी व्यवस्था उल्लेख गरिएको जनाएको छ। कानुनको शासनले संवैधानिक उपायहरू उपलब्ध गराउने भएकाले ती उपायहरू कानुनी प्रक्रियाभित्रै खोजिनुपर्ने ज्ञानको धारणा छ।
ज्ञानले सबै सरोकारवालालाई कानुन आफ्नै हातमा नलिन आग्रह गरेको छ। हालको अवस्था अत्यन्त संवेदनशील रहेको उल्लेख गर्दै, विद्यार्थीहरू अन्तिम तथा वार्षिक परीक्षामा सहभागी भइरहेका बेला कुनै पनि प्रकारको अवरोधले उनीहरूको भविष्यमा अपूरणीय क्षति पुर्याउन सक्ने चेतावनी दिइएको छ। विद्यार्थीहरू यस कानुनी विवादका पक्षकार नभएकाले उनीहरूलाई असर पर्न नदिनु सबैको दायित्व रहेको संगठनको भनाइ छ।
वर्तमान कानुनी स्थितिबारे स्पष्ट पार्दै ज्ञानले माननीय न्यायालयले अपनाइएको चयन प्रक्रियाका कारण ३१३ जना शिक्षकहरूको नियुक्ति अवैध ठहर गरेको तथ्य फैसलामा स्पष्ट रूपमा उल्लेख भएको जनाएको छ। जबसम्म उक्त आदेश कुनै उच्च न्यायिक निकायबाट स्थगित वा उल्ट्याइँदैन, तबसम्म सो आदेश बाध्यकारी र कार्यान्वयनयोग्य रहने संगठनको धारणा छ।
कुनै पनि न्यायिक फैसलाप्रति असहमति भएमा दबाब, बन्द वा सार्वजनिक जीवनमा अवरोध सिर्जना गर्ने माध्यमभन्दा कानुनी अपिल र संवैधानिक प्रक्रियामार्फत समाधान खोजिनुपर्नेमा ज्ञानले जोड दिएको छ। दार्जिलिङ पहाडमा शान्ति, संयम र संवैधानिक अनुशासन कायम राख्नु अपरिहार्य रहेको उल्लेख गर्दै, प्रशासनिक असफलता वा कानुनी विवादका कारण विद्यार्थीहरूको भविष्य बन्धक बन्न नहुने संगठनले स्पष्ट पारेको छ।
ज्ञानले सबै संघ–संस्था, शैक्षिक निकाय तथा आम नागरिकलाई शान्त रहन, कानुनी प्रक्रियालाई आफ्नो मार्गमा अघि बढ्न दिन तथा दार्जिलिङ पहाडको शैक्षिक वातावरणलाई थप अस्थिर नबनाउन आग्रह गरेको छ
