तीनधारे, (निसं): भारतीय गोर्खा प्रजातान्त्रिक मोर्चा महानदी ग्राम पञ्चायत स्तरीय खण्ड समितिको सांगठनिक सभा जंगपाना चियाबारीमा सम्पन्न भएको छ। उक्त सांगठनिक सभा माथिल्लो जंगपाना चियाबारीको सभापति बिनोद गुरुङ्को अध्यक्षतामा सम्पन्न भएको छ।
सभालाई हिल तराई डुवर्स प्लान्टेशन वर्कर्स युनियन खरसाङ महकुमा समितिको सभापति सागर गुरुङ, तीनधारे महानदी समष्टिको संयोजक राजेस थापा, भागोप्रमो महानदी ग्राम पञ्चायत स्तरीय ब्लक कमिटीको सभापति एवं पञ्चायत समिति सदस्य कुसाङ लामा, पञ्चायत सदस्या रञ्जना छेत्री आदि सम्बोधन गरेका थिए।जंगपाना चियाबारीको दुईवटा शाखाहरुलाई लिएर आयोजित सांगठनिक सभामा वक्ताहरुले पार्टीको सांगठनिक गतिविधि र आगामी दिनहरुमा गरिने कार्यक्रमहरु विषयमा जानकारी गराइएको छ।
सभामा वक्ताहरुले जंगपाना चियाबारी क्षेत्रमा भईरहेको विभिन्न विकास कार्यहरु विषयमा पनि चर्चा परिचर्चा गरिएको छ। सभामा जंगपाना चियाबारीमा आगामी दिनमा सार्वजनिक भवनको शिलान्यास कार्यक्रममा जीटीए प्रमुख अनित थापाको उपस्थिति रहने विषयमा पनि जानकारी गराइएको छ।
सभामा भारतीय गोर्खा प्रजातान्त्रिक मोर्चा महानदी ग्राम पञ्चायत स्तरीय ब्लक कमिटीको सचिव बसन्त राई, कोषाध्यक्ष निखिल छेत्री लगायत जंगपाना चियाबारीको दुईवटा शाखाका पदाधिकारीहरु पनि उपस्थित रहेका थिए। सभापछि पत्रकारहरुसित कुराकानी गर्दै हिल तराई डुवर्स प्लान्टेशन वर्कर्स युनियन खरसाङ महकुमा समितिको सभापति सागर गुरुङले विस्तृत जानकारी गराएका छन्।
