फुटबल सुपरस्टार लियोनल मेसीलाई हेर्न कोलकत्तामा भेला भएका समर्थकहरू उनलाई देख्न नपाएपछि आक्रोशित भएका छन्। रंगशालामा उपस्थित भीडले बोतल प्रहार गर्दै असन्तोष व्यक्त गरेको थियो। मेसी आउने घोषणापछि उनलाई प्रत्यक्ष हेर्ने उद्देश्यले ठूलो संख्यामा समर्थकले टिकट खरिद गरेका थिए। तर, टिकट लिएका दर्शकहरूले घण्टौँ कुर्दा पनि मेसीलाई देख्न नपाएको प्रतिक्रिया ‘टाइम्स अफ इन्डिया’सँग दिएका छन्।
‘न हामीले उनलाई प्रत्यक्ष देख्यौँ, न त टेलिभिजन स्क्रिनमै,’ टाइम्स अफ इन्डियाले समर्थकहरूलाई उद्धृत गर्दै उल्लेख गरेको छ।
घटनापछि प्रमुख आयोजक सताद्रु दत्तालाई पक्राउ गरिएको पश्चिम बंगाल प्रहरीका महानिरीक्षक राजीब कुमारले जानकारी दिएका छन्। उनका अनुसार खराब व्यवस्थापन दोहोरिन नदिन कारबाही प्रक्रिया अघि बढाइएको हो।
यस घटनामा देखिएको अव्यवस्थाप्रति पश्चिम बंगालकी मुख्यमन्त्री ममता बनर्जीले दुःख व्यक्त गर्दै मेसीसँग माफी मागेकी छन्। ‘आज साल्ट लेक रंगशालामा देखिएको खराब व्यवस्थापनले मलाई पीडा दिएको छ,’ उनले भनेकी छन्। उनले टिकट काटेर पनि मेसीलाई भेट्न नपाएका समर्थकहरूसँगै मेसीसँग पनि क्षमायाचना गरेकी छन्।
मेसी हाल तीन दिने भारत भ्रमणमा छन्। हैदरावाद र मुम्बईको भ्रमणपछि उनी सोमबार दिल्ली पुगेर आफ्नो यात्रा सम्पन्न गर्ने कार्यक्रम रहेको छ। यस भ्रमणमा लुईज सुआरेज र रोड्रिगो डि पाउल पनि मेसीसँगै छन्। यसअघि शनिबार मेसीले कोलकत्तामा २१ मिटर अग्लो आफ्नै सालिकको अनावरण गरेका थिए।
