अप्पर पजेङको नन्द गाउँमा आगोलाग्दा एक घर जलेर खरानी

सोनादा, (निसं): सोनादा पचेङ समष्टिको अप्पर पचेङ नन्द गाउँमा आईतवार राती आगलागी हुँदा एक घर जलेर खरानी भएको छ। उक्त आगलागीमा दुई तल्ले काठको घर जलेर खरानी बनेको छ। रातीको 12 बजीको समयमा भएको आगलागीमा अप्पर पचेङ नन्द गाउँ निवासी हर्कबहादुर गुरुङ्को घर जलेर नष्ट भएको छ। यस आगलागीमा दुई तल्ले काठको घर सबै जलेर खरानीमा परिणत भएको छ। भाग्यवंश कुनै मानवीय क्षति भएन तर आगलागीमा घर जलेर खरानी बनेपछि घरबाट केही पनि निकाल्न नपाएको स्थानीयहरुले बताएका छन्‌‍। आगलागीमा जीउमा लगाएको लुगाबाहेक केही पनि निकाल्न नपाएको साथै सबै सर सामानहरु र कागज पत्रहरु पनि जलेर नष्ट भएको छ। उक्त आगलागीको घटना सुनेर खरसाङ अग्निशमन केन्द्रबाट दमकल आए पनि घर सबै जलिसकेको बताइएको छ। हर्कबहादुर गुरुङ चियाबारीको अवकाशप्राप्त श्रमिक रहेका छन्‌‍। यस आगलागीको घटना सुनेर लोवर सोनादा ग्राम पञ्चायत दुईको पञ्चायत प्रधान रेखा तामाङ, पञ्चायत सदस्य पुरण राई र सोनादा पुलिस आउट पोष्टबाट पुलिसहरु घटनास्थलमा पुगेका छन्‌‍। यस आगलागीको घटनामा अन्य घरहरु आगलागीबाट जोगाउन स्थानीयहरुले धेरै सहयोग गरेको जानकारी प्राप्त भएको छ। यसको साथै सुखे खण्डको संयुक्त खण्ड विकास अधिकारी देवदत्त ब्यानर्जी, क्षेत्रीय सभासद अनोश थापा, भारतीय गोर्खा प्रजातान्त्रिक मोर्चाको पदाधिकारीहरु पनि उपस्थित रहेका थिए। उक्त आगलागीको घटनामा पिढीत परिवारलाई सभासद अनोश थापाले राहत सामग्रीहरु वितरण गरेका छन्‌‍।