सभासद अजय एडवर्ड्सले चिया बगानका मजदुरहरूका लागि न्यूनतम ज्याला औपचारिक रूपमा लागू नभएसम्म अन्तरिम उपायका रूपमा दैनिक ५०० रुपैयाँ ज्याला दिनुहोस् भनी माननीय मुख्यमन्त्री ममता बनर्जीसमक्ष अपिल गरेका छन्।
सभासद अजय लुकास एडवर्ड्सले पश्चिम बंगालकी मुख्यमन्त्री ममता ब्यानर्जीलाई एक ज्ञापनपत्र बुझाउँदै उत्तर बंगालका पहाड, तराई र डुवर्स क्षेत्रका चिया बगान मजदुरहरूका लागि न्यूनतम ज्याला लागू गर्न राज्य सरकारसँग आग्रह गरेका छन्।
मार्च १२ तारिखको उक्त ज्ञापनपत्रमा एडवर्ड्सले चिया बगान मजदुरहरूले लामो समयदेखि भोग्दै आएको आर्थिक समस्याबारे उल्लेख गरेका छन्।उनले भनेका छन् कि पुस्तौंदेखि यी मजदुरहरूले चिया उद्योगलाई धानेका छन् र आज पनि क्षेत्रीय अर्थतन्त्रको सबैभन्दा महत्वपूर्ण क्षेत्रलाई टिकाइरहेका छन्। एडवर्ड्सका अनुसार,चिया बगान मजदुरहरूलाई अन्तिम पटक अन्तरिम राहतस्वरूप दैनिक ₹३० वृद्धि १ जुन २०२३ देखि लागू गरिएको थियो।तर त्यसपछि करिब तीन वर्ष बितिसक्दा पनि तलब पुनःसमायोजन वा न्यूनतम ज्याला लागू गरिएको छैन, जसका कारण हजारौं मजदुर परिवारहरू बढ्दो जीवनयापन खर्चका कारण समस्यामा परिरहेका छन्। ज्ञापनपत्रमा छिमेकी राज्यहरूको अवस्थासमेत तुलना गरिएको छ।एडवर्ड्सले उल्लेख गरेका छन् कि असम सरकारले हालै चिया बगान मजदुरहरूको दैनिक ज्यालामा अन्तरिम रूपमा ₹३० वृद्धि स्वीकृत गरेको छ।साथै असममा मजदुरहरूलाई ओरुनोदोई योजना अन्तर्गत ₹९,००० आर्थिक सहायता पनि प्रदान गरिएको छ। उनले थप बताए कि सिक्किमले चिया बगान मजदुरहरूको दैनिक ज्याला ₹५०० निर्धारण गरिसकेको छ।उनका अनुसार सिक्किमको भौगोलिक अवस्था,उचाइ र काम गर्ने वातावरण उत्तर बंगालका पहाड,तराई र डुवर्स क्षेत्रसँग धेरै हदसम्म मिल्दोजुल्दो छ।
यी सबै कारणलाई ध्यानमा राख्दै एडवर्ड्सले मुख्यमन्त्रीसँग औपचारिक रूपमा न्यूनतम ज्याला लागू नभएसम्मका लागि अन्तरिम रूपमा दैनिक ₹५०० ज्याला स्वीकृत गर्न अपिल गरेका छन्।
उनले यस्तो निर्णयले आर्थिक कठिनाइ र बढ्दो जीवनयापन खर्चसँग जुधिरहेका लाखौं चिया बगान मजदुर परिवारलाई ठूलो राहत पुग्ने बताएको छ।
एडवर्ड्सले राज्य सरकारले यो अपिललाई गम्भीरतापूर्वक विचार गरी पहाड,तराई र डुवर्स क्षेत्रका चिया बगान समुदायको हितमा छिट्टै कदम चाल्ने आशा व्यक्त गरेका छन्।
