४२ नम्बर समष्टि अन्तर्गत लोवर पाबुङ क्षेत्रमा बहुप्रतिक्षित सडक निर्माण कार्यको शिलान्यास कार्यक्रम सम्पन्न भएको छ। कार्यक्रममा रुदेन शादा लेप्चा र सभासद हेमन्त राईको विशेष उपस्थिति रहेको थियो।राज्य सरकारको पथ श्री योजना अन्तर्गत निर्माण हुन लागेको उक्त सडक चौतारा डाँडादेखि पच्छिम घिसिङ गाउँसम्म करिब १.५ किलोमिटर लम्बाइको हुनेछ। लामो समयदेखि यातायातको समस्या झेल्दै आएका स्थानीय बासिन्दाका लागि यो सडक निर्माण अत्यन्त महत्वपूर्ण मानिएको छ।
कार्यक्रमलाई सम्बोधन गर्दै विधायक रुदेन शादा लेप्चाले ग्रामीण क्षेत्रको समग्र विकास आफ्नो प्राथमिकता रहेको बताउँदै सडक, यातायात, कृषि, स्वास्थ्य तथा अन्य आधारभूत पूर्वाधारमा निरन्तर काम भइरहेको उल्लेख गरे। उनले ग्रामीण जनताको जीवनस्तर उकास्न यस्ता योजनाले ठूलो भूमिका खेल्ने विश्वास व्यक्त गरे।
स्थानीयवासीहरूले सडक निर्माणको काम सुरु भएकोमा खुशी व्यक्त गर्दै यसले गाउँमा नयाँ सम्भावनाहरू खोल्ने बताएका छन्। विशेषगरी कृषि उत्पादन बजारसम्म पुर्याउन, बिरामी तथा विद्यार्थीको आवतजावत सहज बनाउन र समग्र आर्थिक गतिविधि बढाउन सडकले सकारात्मक प्रभाव पार्ने अपेक्षा गरिएको छ।शिलान्याससँगै गाउँमा उत्साह र खुशीको माहोल देखिएको छ। वर्षौँदेखि देखिएको सपना साकार हुन थालेपछि स्थानीयले विकासको नयाँ अध्याय सुरु भएको प्रतिक्रिया दिएका छन्।
