स्कूल अफ् गिटार लर्निङको आयोजनामा संगीतलाई लिएर सचेतना कार्यक्रम सम्पन्न

खरसाङ, 29 जून (निसं)ःखरसाङको नयाँ बजारस्थित स्कूल अफ् गिटार लर्निङको आयोजनामा आइतवार खरसाङमा संगीतलाई लिएर सचेतना कार्यक्रम सम्पन्न भएको छ। खरसाङको वर्द्धमान रोडमा रहेको एक होटलमा सम्पन्न कार्यक्रममा प्रमुख अतिथिको रुपमा भायोलिन वादक देशराज गजमेर उपस्थित रहेका थिए। कार्यक्रममा संगीत विषयमा नानीहरुलाई सचेतना एंव जानकारी गराउन मुख्य शोध वक्ताको रुपमा आन्दन्ते स्कूल अफ् म्युजिक सिलगढ़ीका निर्देशक अभिषेक गहतराज उपस्थित रहेका थिए। कार्यक्रममा अमीरमाया गहतराज, निर्मल कुमार गहतराज लगायत अन्यहरु उपस्थित रहेका थिए। यस कार्यक्रमलाई स्कूल अफ् गिटार लर्लिङ खरसाङका निर्देशक नर्बु छिरिङ शेर्पाले सञ्चालन गरेका थिए। यस कार्यक्रममा नानीहरु र अभिभावकहरुलाई आन्दन्ते स्कूल अफ् म्युजिक सिलगढ़ीको निर्देशक अभिषेक गहतराजले संगीतको विभिन्न विषयहरुमा चर्चा परिचर्चा गर्दै जानकारीसहित सचेतना गराएका थिए। यस कार्यक्रममा स्कूल अफ् गिटार लर्निङ स्कूलका नानीहरुले संगीतमा आफ्नो आफ्नो प्रस्तुतिहरु दिएका थिए। कार्यक्रममा स्कूल अफ् गिटार लर्निङका निर्देशक एंव गिटारिस्ट नर्बु छिरिङ शेर्पाले पनि आफ्नो प्रस्तुति दिएका थिए। कार्यक्रममा उपस्थित अतिथिहरुलाई स्कूल अफ् गिटार लर्निङ खरसाङको तर्फबाट स्मृति चिन्ह प्रदान गरेर सम्मान जनाइएको छ। यस कार्यक्रममा प्रमुख अतिथिको रुपमा उपस्थित भायोलिन वादक देशराज गजमेरले आफ्नो सम्बोधनमा कार्यक्रम अति राम्रो रहेको र कलिलो हातहरुले राम्रो प्रस्तुति दिएको बताएका छन्। उनले पुरानो समयमा अहिलेको जस्तो यसरी संगीत सिक्ने माहोल थिएन भन्दै अहिलेको नानीहरुले संगीत सिक्ने राम्रो अवसर पाएको पनि बताएका छन्। मुख्य अतिथि देशराज गजमेरले संगीतमा शक्ति छ भन्दै संगीत भनेको संगीत नै हो र संगीत सिक्नुलाई नानीहरुले यसरी नै मौका पाएकोमा खण्डमा राम्रो हुने पनि बताएका छन्।