खरसाङ, 19 जुलाई (निसं): खरसाङको
भिक्टोरिया बोईज स्कूलका विद्यार्थीहरूको सहभागितामा वन महोत्सव पालन गरिएको छ। खरसाङ डिभिजनको खरसाङ रेञ्ज अन्तर्गत डाउहिलमा आयोजना गरिएको यो कार्यक्रममा भिक्टोरिया बोईज स्कूलका विद्यार्थीहरूले वृक्ष रोपण गरे, जंगलमा रहेका विभिन्न फोहोर-मैलाहरूको सफाई गरे, विद्यार्थीहरूले जंगलमा रहेका वृक्षहरूलाई अङ्गालो हाल्दै वृक्ष अथवा प्रकृकिसित प्रेमको भाव प्रकट गरे अनि जंगलमा रहेका बहुमूल्य पौधाहरूको बारेमा जानकारी प्राप्त गरे। कार्यक्रममा सहभागी विद्यार्थीहरूले डाउहिल फरेष्ट म्युजियमको पनि भ्रमण गरे अनि त्यहाँ विविध वन्य जीव-जन्तु, वन्य सम्पदा विषयमा ज्ञान प्राप्त गरे। कार्यक्रममा विद्यालयका प्रधान अध्यापक मलय साहा, खरसाङ महकुमा शासक विन्दावासी तेजा दिपक, डीएफओ देवेस पाण्डे, वन विभागका अधिकारीहरू अनि अन्यन्या विशिष्ट व्यक्तिहरू उपस्थित थिए। विद्यालय पक्षले दिएको जानकारी अनुसार 19 जुलाईको दिन विद्यालयमा उपस्थित रहेका भारतको राष्ट्रिय महिला फुटबल टीमका मुख्य प्रशिक्षक क्रिस्पिन छेत्रीसित विद्यार्थीहरूले भेट गरेर तिनीसित अन्तरक्रिया पनि गरे। छेत्रीलाई विद्यालयको पक्षबाट सम्मान जनाइएको थियो।
