दिल्ली — दिल्ली क्यापिटल्सले राजस्थान रोयल्सलाई सुपर ओभरमा पराजित गर्दै इन्डियन प्रिमियर लिग (आईपीएल) क्रिकेटको शीर्षस्थानमा उक्लेको छ । सुपर ओभरमा राजस्थानले ५ बल खेलेर दुवै विकेट गुमाई ११ रनमात्र बनाउन सकेको थियो । दिल्लीबाट केएल राहुल र ट्रिस्टन स्टब्सको जोडीले ४ बलमै १३ रन बनाएको थियो ।
यसअघि टस हारेपछि ब्याटिङको निम्तो पाएको दिल्लीले अरुण जेट्ली रंगशालामा निर्धारित २० ओभरमा ५ विकेट गुमाई १ सय ८८ रन बनाएको थियो ।
जवाफमा आएको राजस्थानलाई अन्तिम ओभरमा विजयका लागि ९ रन आवश्यक थियो । त्यो अन्तिम बलमा २ रन बनाउनुपर्ने अवस्थामा पुगेको थियो । तर ध्रुव जुरेलले १ रनमात्र बनाउन सकेपछि खेल ‘टाइ’ हुँदै पुगेर सुपर ओभरमा पुगेको थियो ।
दिल्लीको ६ खेलमा यो पाँचौं विजय हो । यता राजस्थानले ७ खेलमा ५ पराजय भोगिसकेको छ । दिल्लीबाट अभिषेक पोरेलले ३७ बल खेल्दै ५ चौका र १ छक्कासहित ४९, राहुलले ३२ बलमा समान २ चौका र छक्कासहित ३८, स्टब्सले १८ बलमा अविजित ३४, कप्तान अक्षर पटेलले १४ बलमा ४ चौका र २ छक्का प्रहार गर्दै ३४ रन बनाएका थिए । राजस्थानबाट जोफ्रा आर्चरले २ विकेट लिए ।
राजस्थानबाट यशस्वी जयसवालले ३७ बल खेल्दै ३ चौका र ४ छक्कासहित ५१, सञ्जु सामसनले १९ बलमा ३१, नितिश रानाले २८ बलमा ६ चौका र २ छक्कासहित ५१ तथा जुरेलले १७ बलमा २६ रन बनाएका थिए ।
