खरसाङ, 16 जुलाई (मोहन प्रसाद): सीपीएमका राज्य कमिटीका सचिव मोहम्मद सलीम आगामी 31 जुलाई दार्जीलिङ आउने छन् अनि डीवाईएफआईद्वारा प्रकाशित हुने पत्रिका अथवा मुखपत्रको नेपाली संस्करणको तिनले उद्घाटन गर्नेछन्। उक्त जानकारी खरसाङ्मा पत्रकारहरूसित बोल्दै, डीवाईएफआई दार्जीलिङ जिल्ला सचिव सागर शर्माले दिएका छन्। बुधवार खरसाङस्थित गोर्खा जनपुस्तकालय भवनमा सीपीएमको एरिया कमिटीको सभा भएको थियो। उक्त सभामा पार्टीका प्रतिनिधिहरू साथै कार्यकर्ताहरू विभिन्न स्थानबाट उपस्थित रहेका थिए। यसै सभापछि पत्रकारहरूसित बोल्दै पार्टीका नेतृत्वहरूले जनाए अनुसार आगामी 31 जुलाई राज्य कमिटी सचिव मोहम्मद सलीम दार्जीलिङ आइरहेका छन्। आगामी 12 अगस्तको दिन पार्टीद्वारा शिक्षा घोटाला सहित विभिन्न विकासमूलक योजनाहरूमा भइरहेको व्यापक भ्रष्टाचार, सयदिने रोजगार आदि विषयलाई लिएर खरसाङ खण्ड अधिकारी साथै महकुमा अधिकारी कार्यालय अघि धरना-प्रदर्शन गरिने छ अनि ज्ञापन पत्र बुझाइने छ भनी पार्टीका खरसाङ एरिया कमिटी सचिव चेतन गुरुङले बताएका छन्। चेतन गुरुङले थप जनाए अनुसार, गोर्खा जन पुस्तकालयमा आयोजित बुधवारको सभामा पार्टीको प्रतिनिधिहरू सोनादा अनि मङ्पू क्षेत्रबाट पनि उपस्थित थिए। पार्टीले मूलभूत मुद्दा संगै जातीय मुद्दामाथि पनि विभिन्न कार्यक्रम गरिने तिनले बताएका छन्। पार्टीका डिष्ट्रिक्ट सेक्टरिएट मेम्बर सचिन खाती, डीवाईएफआई जिल्ला सह सचिव दीपा तामाङ अनि स्थानीय प्रतिनिधि नरेन प्रधानको पनि सभामा उपस्थिति थियो ।
