सिलगढ़ीमा गोर्खा विद्यार्थीहरुमाथि भएको घटनाको भाजपा महिला मोर्चाको भत्सर्ना

खरसाङ, (निसं): सिलगढीको हाकिमपाड़ामा डुवर्सका गोर्खा विद्यार्थीहरुमाथि भएको घटना र अपशब्द प्रयोगबारे भारतीय जनता पार्टी महिला मोर्चाकी दार्जीलिङ जिल्ला समिति उपसभापति रोमा छेत्रीले पार्टी अनि संगठनको पक्षबाट घोर आपत्ति साथै भत्सर्ना जनाएकी छन्‌‍। तिनले ती महिलाहरूले विद्यार्थीहरूलाई विदेशीको लाञ्छना समेत लगाएको बताउँदै यसको कठोर भाषामा निन्दा प्रकट गर्दछु भनेकी छन्‌‍। यसले प्रमाण गर्छ, गोर्खाहरुमाथि हेरिने दृष्टिकोण अहिले पनि परिवर्तन भएको छैन। यसको मूल कारण राज्य सरकारको प्रशासनिक कमजोरी, असफलता र उदासीनता हो भनी छेत्रीले जनाएकी छन्‌‍। छेत्रीले भनेकी छन्‌‍, हामी साम्प्रदायिक सम्प्रीतिमा विश्वास गर्छौँ तर हामीलाई लगाएको विदेशीको लाञ्छना हामी मात्रै होइन कुनै सभ्य समाजले सहन गर्नु सक्तैन। देश रक्षा गर्ने प्रथम सेवक गोर्खा जातिमाथि सरकारको सकारात्मक दृष्टिकोण नभएको कारणले नै काँड़े तारबाट छिरेका विदेशीहरुले हामीलाई विदेशीको लाञ्छना लगाइरहेका छन्‌‍। देशको निम्ति मर्नेहरुले उल्टै विदेशी भनी लाञ्छना सहनु परिरहेका छन्‌‍। सरकार किन मौन छ? कार्यवाही किन हुँदैन? पीड़ितहरुले एफआइआर गरिसकेका छन्‌‍। बंगाल पुलिसले उचित कार्यवाही गरून्‌‍। हामी विदेशी होइनौँ हाम्रो इतिहास हाम्रो प्रमाण हो। घरिघरि हाम्रो भारतीय पहिचानमाथि शंकास्पद बयान गर्ने अधिकार कसैलाई छैन। जजसले हामीलाई बाहिरका भन्छन्‌‍ वास्तवमा उनीहरु नै बाहिरका हुन्‌‍ औ भोटको लागि राज्य सरकारले संरक्षण र मद्दत दिएर राखेका छन्‌‍। यो अविलम्ब बन्द हुनुपर्छ।