काठमाडौँ — सेयर कारोबार मापक नेप्से परिसूचक सोमबार २ हजार ७ सयभन्दा मुनि झरेर बन्द भएको छ । गत साताका अन्तिम तीन कारोबार दिन लगातार बढेर बन्द भएको नेप्से यो साता पहिलो र देस्रो दुवै दिन घटेको छ । यससँगै सोमबार समग्र नेप्से २ हजार ७ सयभन्दा तल ओर्लिएर बन्द भएको हो ।
आइतबारको तुलनामा सोमबार नेप्से ७.७५ अंकले घटेको छ । गत बिहीबार २६.४९ अंकले बढेर नेप्से २ हजार ७ सय २२.७३ बिन्दुमा उक्लिएको थियो । गत साता सात कारोबार दिनपछि नेप्सेले २७ सय बिन्दु पार गरेको थियो । तर गत आइतबार १६.६८ अंकले घटेर नेप्से २ हजार ७ सय ६.०४ बिन्दुमा ओर्लिएको थियो । आइतबारको तुलनामा ०.२८ प्रतिशतले घटेर सोमबार नेप्से २ हजार ६ सय ९८.२८ बिन्दुमा ओर्लिएको छ ।
पछिल्ला दिनमा सेयर बजारमा अपेक्षाविपरीत प्रवृत्ति देखिएको जानकार बताउँछन् । कुनै दिन बिनाकारण नेप्से उच्च अंकले बढिरहेको हुन्छ भने कुनै दिन उच्च अंकले ओरालो लाग्छ ।
यस्तो प्रवृत्तिले अझै पनि नेपालको पुँजीबजार परिपक्व हुन नसकेको एक सेयर ब्रोकरले जनाए । त्यसै पनि सेयर बजार सट्टेबाजीमै चल्ने बजार हो । तर पनि थोरै धेरै अनुमानयोग्य त हुनुपर्थ्यो तर नभएको ती अधिकारीको भनाइ छ ।
अर्थतन्त्र शिथिल छ । यसको असर बैंक तथा वित्तीय संस्थाको वित्तीय विवरणमा परेको छ । त्यसबाहेक सेयर बजार घट्नुपर्ने कुनै कारण नभए पनि लगातार घट्ने गरेको ती अधिकारीले बताए । सोमबार कारोबारमा आएकामध्ये ११२ कम्पनीको सेयर मूल्य बढ्यो भने १३३ वटाको घट्यो, एउटा कम्पनीको स्थिर रह्यो । कुल ७८ हजार ६ सय ७८ पटकको सेयर कारोबारमा २ करोड १२ लाख ३ हजार ७ सय ६६ कित्ता सेयर खरिदबिक्री भएको छ । ती किनबेचबाट ८ अर्ब ७७ करोड ५७ लाख रुपैयाँ बराबरको सेयर कारोबार भएको छ ।
आइतबारको तुलनामा कारोबार रकम बढेको नेप्सेले जनाएको छ । आइतबार ८ अर्ब ४३ करोड ३५ लाख रुपैयाँ बराबरको सेयर कारोबार भएको थियो । कुल १३ उपसमूहमध्ये बैंकिङ, वित्त कम्पनी, लघुवित्त, जीवन बिमा, निर्जीवन बिमा, व्यापार र अन्यको परिसूचक घटे । व्यापार ७०.४४, फाइनान्स २६.१७, अन्य २३.८८, जीवन बिमा २२.१५ र निर्जीवन बिमा १९.६९ अंकले घटेको छ ।
विकास बैंक, होटल तथा पर्यटन, हाइड्रोपावर, लगानी, उत्पादन तथा प्रशोधन र म्युचअल फन्ड उपसमूहको परिसूचक बढेको नेप्सेले जनाएको छ । जसअनुसार जलविद्युत् २७.३६ र विकास बैंक २४.६६ अंकले बढेको नेप्सेको भनाइ छ । नेपाल माइक्रो इन्स्योरेन्स कम्पनीको ९.९९, क्रेस्ट माइक्रो लाइफ इन्स्योरेन्सको ९.९९, कर्पोरेट विकास बैंकको ९.८८, युनिभर्सल पावर कम्पनीको ९.८० रन नेपाल हाइड्रो डेभलपर्सको सेयर मूल्य ९.०७ प्रतिशतले बढेको नेप्सेको तथ्यांक छ ।
गुडविल फाइनान्स लिमिटेड डिबेन्चर २०८३ को ७.७५, एनएमबी हाइब्रिड फन्ड (दोस्रो) को ७.७०, नेपाल एसबीआई बैंकको ४.१७, विन नेपाल लघुवित्तको ४.०२ र ग्रिन डेभलपमेन्ट बैंकको ३.९६ प्रतिशतले सेयर मूल्य घटेको नेप्सेले जनाएको छ ।
कारोबार रकमका आधारमा ङादी ग्रुप पावर, युनिभर्सल पावर कम्पनी, हाइड्रोइलेक्ट्रिसिटी इन्भेस्टमेन्ट एन्ड डेभलपमेन्ट कम्पनी, हिमालयन पावर पार्टनर र एनआरआएन इन्फ्रास्ट्रक्चर एन्ड डेभलपमेन्ट बैंक अघि रह्यो । ङादी ग्रुप पावरको ५३ करोड ९९ लाख, युनिभर्सल पावर कम्पनीको ५२ करोड ४७ लाख रुपैयाँको सेयर कारोबार भएको छ ।
सोमबार पनि सबैभन्दा बढी सेयर कारोबार जलविद्युत् उपसमूहअन्तर्गतका कम्पनीको भएको छ । यो उपसमूहको कुल ४ अर्ब ४७ करोड ९० लाख, लगानीको १ अर्ब २२ करोड २५ लाख ३१ हजार र लघुवित्तको २४ करोड १ लाख ८६ हजार रुपैयाँको सेयर कारोबार भएको नेप्सेले बताएको छ ।
