भाषा-साहित्यलाई लिएर राजनीतिक दुनो सोझ्याउने काम गर्नु हुँदैनः अरासाम

खरसाङ, (निसं)ः असीत राई साहित्यिक मञ्चको नवौँ मासिक साहित्यिक प्रकरण सम्पन्न भयो। खरसाङ्को ब्लुमफिल्ड महकुमा पुस्तकालय भवनमा सम्पन्न भएको यस प्रकरण नेपाली भाषा मान्यता दिवसको अवसरमा आयोजना गरिएको हो। प्रकरणका संयोजक सम्भू कुमार राईद्वारा सञ्चालित यस कार्यक्रममा नेपाली भाषा, वर्तमानको राजनीतिक, सामाजिक विषयमा केन्द्रित कविताहरू रचिता छेत्री, रचना राई अनाकार, मीना लामा राई, ऋषि राई अनि सम्भू कुमार राईले पठन गरेका थिए। कार्यक्रममा वरिष्ठ सदस्य एवं समाजसेवी सूर्यनारायण प्रधानले भाषाको महत्व, शिक्षा र साहित्यको विषयमा आफ्नो मन्तव्य प्रकट गरेका थिए। मञ्चका सचिव दीपक ठटाल जलनले नेपाली भाषाको उत्पति, मिठास, विशेषता र समृद्धताको बारेमा आफ्नो मन्तव्य प्रकट गरेका थिए। तिनले आफ्नो वक्तव्यमा सतही ज्ञान लिएर गोर्खा भाषा र नेपाली भाषाबारे विवाद सृजना गर्न नहुने, भाषालाई लिएर राजनीतिकरण गर्न नहुने बताए। तिनले भाषालाई लिएर सबैले व्यहारिक रुपमा कार्य गर्न पर्ने आवश्यकतामाथि जोर दिए। मञ्चका अध्यक्ष ऋषि राईले भाषाको सही प्रयोग, शिक्षण पद्धति अनि अध्ययन संस्कारमाथि गम्भीर भएर कार्य गर्ने, साहित्यिक धरोहर, प्रतिष्ठित स्रष्टाहरूको व्यक्तित्व अनि कृतित्वमा आँच आउने काम गर्न नहुने बताउदै भाषा-साहित्य जस्तो पवित्र वस्तुमाथि राजनीतिक दुनो सोझ्याउने काम गर्न नहुने विचार प्रकट गरे। तिनले भविष्यमा महानदी क्षेत्रका संगीतकार अनि अर्का साहित्यकारमाथि खोजीमूलक कार्य गर्ने प्रतिवद्धता पनि आफ्नो वक्तव्यमा जाहेर गरे। कार्यक्रममा गोर्खा जनपुस्तकालयद्वारा समर्पित शिक्षक सम्मानले सम्मानित गरिएकोमा मञ्चका सहसचिव एवं सन्त जोसेफ कन्या उच्चतर माध्यमिक विद्यालयकी शिक्षिक मीना लामा राईलाई मञ्चको पक्षबाट सबैले बधाई अनि आगामी दिनहरूको निम्ति शुभकामा दिए भनी जानकारी दिइएको छ।