गोरुबथान, 3 जुलाई (लेनिन राई) ; अम्बियोक बस्तीमा दुई दिने क्षमता अभिवृद्धि कार्यशाला सम्पन्न भएको जानकारी प्राप्त भएको छ। यस क्षेत्रमा पनि बर्ड टुरिजमलाई प्रोमोट गर्ने उद्देश्यले स्थानीय युवाहरुलाई लिएर सो कार्यशाला गरिएको जानकारी प्रवेश राईले दिएका छन्। दार्जिलिङ, कालेबुङ साथै हिमालय क्षेत्रको चराहरुलाई चिन्हित गरेर पर्यटकहरुलाई गाइड गरिनुपर्ने बारे सो कार्यशालामा तालिम दिइएको थियो। उक्त कार्यशालामा पूर्वी हिमालय क्षेत्रमा पाइने चराचुरुंगी साथै पुतलीहरूको पहिचान, गाइडिङ सीप आदि बारे सैद्धान्तिक र व्यावहारिक तालिम दिइयो। उक्त तालिममा पाँचवटा गाउँबाट 22 जना युवाहरुले सहभागीता जनाएका थिए।
अशोका ट्रस्ट फर रिसर्च इन इकोलोजी एण्ड द इन्भारोमेन्ट (एटिआरइइ) – को आयोजनामा अनि रुफोर्ड फाउन्डेसन (युके) – को सहयोगमा सम्पन्न भएको दुईदिने कार्यशाला आदित्य प्रधान र यशवी देवानको अगुवाईमा भएको थियो भने डा. सैबल सेनगुप्ता (सन्त रोबर्ट्स स्कूल, दार्जीलिंग), सन्जीब प्रधान (रिम्बिक नेचर गाइड एसोसिएसन), डा. अवन्तिका थापा र यमलम बेन्जामिन बिडा (एटिआरइइ) आदि प्रमुख स्रोत वक्ता थिए।
