लोवर शेर्पा बस्तीको धोबी खोला क्षेत्रमा पैह्रोले तीन घर क्षति

खरसाङ नगरपालिका अन्तर्गत वार्ड नम्बर 7 को लोवर शेर्पा बस्तीको धोबी खोला क्षेत्रमा हिज बिहान पैह्रोले तीनवटा घरहरुलाई क्षति गरेको छ। बिहान 9.15 बजीतिर रवि छेत्रीको घरबाट पैह्रो झरेर तलपट्टि रहेको घरको छतमा रहेको बताइएको छ। पैह्रोले तलपट्टिको घरलाई क्षतिग्रस्त बनाएको छ भने रबि छेत्रीको घर पैह्रोमा झुण्डिएको अवस्थामा रहेको खरसाङ नगरपालिकाको भाइस चेयरम्यान सुवास प्रधानले जानकारी गराएका छन्।‌ उनले बताए अनुसार यस पैह्रोमा परेर यस वार्डमा तीनवटा घरलाई क्षति पुराएको छ। उक्त पैह्रोग्रस्त क्षेत्रको निरीक्षण क्षेत्रीय सभासद श्याम शेर्पा, खरसाङ नगरपालिकाको भाइस चेयरम्यान सुवास प्रधान, कार्यकारी अधिकारी कैलाश प्रसाद, एसएओ सत्य थापा, सोनाम लामा आदिले गरेको र पैह्रो क्षेत्रमा 6-7 वटा पोलिथिनहरु बिछ्याउने कार्य गरिएको बताइएको छ। उक्त टोलीले पैह्रो ग्रस्त क्षेत्रको नापजोख गरेर मरमत्तिको तयार पारेको र यस पैह्रो विषयमा जीटीए प्रमुख अनित थापा र खरसाङ महकुमा शासकलाई पनि जानकारी गराएका छन्।