प्रिया सुब्बा अनि टोलीद्वारा गाउँलेहरूलाई राहत

विनाशकारी पैह्राेले मिरिक बस्ती जसबीर गाउँ अनि कृषि कुञ्जवासीलाई ठूलो चोट दिएर गएको छ। पैरोको चपेटमा परि जसबीर गाउँमा दुईजनाले ज्यान गुमाएका थिए भने धेरैका घरहरू पुरिएको अनि कृषिकुञ्ज र जसबीर गाउँका १४ परिवार जोखिममा परेका छन्।यसरी नै धेरैजनाको सुन्तलासँगै खेती योग्य जमिन पैरोले तहस नहस पारेको छ। पैरोले स्थानीय देवप्रकाश सुब्बाको वाहन पनि पुरेको छ। हाल यी परिवारहरू राहत शिविरमा बस्दै आइरहेका छन्। आज १४ परिवार मध्ये मृतकका परिवार अनि अन्य अत्यन्तै जोखिममा परेका दुई परिवारलाई स्थानीय जसबीर गाउँ निवासी हाल नक्सलबाडी भूमि औ भूमि सुधार विभागमा कार्यरत प्रिया सुब्बा अनि उनका सहयोगी कर्मचारीहरूले संकलन गरेको आर्थिक सहयोग प्रदान गरियो। उक्त सहयोग राशी मृतक सुमित लेप्चाकी बहिनी सुनिता लेप्चा, पीडितहरू कृषिकुञ्ज निवासी तार्सुङ लेप्चा अनि विद्याचन्द्र राईलाई राहत शिविर समितिका प्रतिनिधिहरू शिक्षक कर्म लेप्चा, विनय राई, रबि छेत्री, ओमकार सुब्बा, विषण सुब्बा, अभिनाश सुब्बा, हेमचन्द्र सुब्बाको उपस्थितिमा प्रदान गरिएको छ। सहयोग राशी प्रदान गरेपछि उनीहरूले प्रिया सुब्बा अनि उनका सहयोगी कर्मचारीहरूप्रति आभार प्रकट गरेका छन्।