“नेतृत्व पद होइन, उपस्थिति हो” विधायक जिम्बा

हालैको भीषण पहिरोले व्यापक जनधनको क्षति पुर्‍याएका दार्जीलिङका विभिन्न क्षेत्रमा विधायक निरज जिम्बाद्वारा निरन्तर राहत कार्यमा संलग्न रहिरहेका छन्। उनले निरन्तर प्रभावित क्षेत्रहरूको भ्रमण गर्दै पीडित परिवारहरूलाई सहयोग र मनोबल प्रदान गर्दै आएका छन्। विधायक जिम्बा र उनको टोलीले पहिरोले विस्थापित तथा प्रभावित परिवारहरूलाई अत्यावश्यक सामग्री खाद्यान्न, पाल (टार्पोलिन), न्यानो लत्ताकपडा लगायतका राहत सामग्री वितरण गरिरहेको छ। कठिन भू–भाग र अवरुद्ध बाटोका कारण चुनौतीपूर्ण परिस्थितिमा पनि राहत टोली निरन्तर रूपमा जनतासम्म पुग्ने प्रयासमा जुटिरहेको उनले बताए। “यी कठिन क्षणहरूले सम्झाउँछ कि नेतृत्व पद होइन, उपस्थितिको प्रमाण हो। प्रत्येक भेटघाट, वार्तालाप र सहयोगका यी साना कदमहरूले हाम्रो सामूहिक आत्मालाई पुनः जागृत गर्छ दार्जीलिङ सधैं एक भएर उभिन्छ” विधायक जिम्बाले बताए। उनले दार्जीलिङका विभिन्न गाउँ, बस्तीमा भइरहेको यस निरन्तर राहत अभियानले पहाडका जनतामा आशा र एकताको सन्देश फैलाएको बताए।