तीनधारे महानदी समष्टि अन्तर्गत सिविटार बाघमारा निवासी 104 वर्षीय बौद्ध धर्म गुरु स्याङ्देन म्हेम्हे (चन्द्रवीर लामा) को निधन भएको छ। उनी बाघमारा बस्तीमा रहेको झ्याङतेर सामतेलिन छ्योलिङ गुम्बाकोा संस्थापक र प्रमुख थिए। उनको जन्म सन् 1921 मा भएको थियो। उनी बज्रयानाको प्रमुख लामा रहेका थिए। उनको निधन बिहीबार राति 10.30 बजीतिर भएको थियो। उनले आफूपछि चारजना छोराहरु र तीनजना छोरीहरु साथै नाता नातिनीहरु र पनाति पनातिनीहरु छोडी गएका छन्। उनको अन्तिम संस्कार आगमी सोमबार गरिने भएको छ। स्याङ्देन म्हेम्हेको निधन भएपछि लगातार रुपमा बौद्ध धर्म अनुसार दीप प्रज्ज्वलन र पूजा पाठ – सिठी पाठ भइरहेको जानकारी प्राप्त भएको छ। उनको निधनपछि सिलगढीको मिलनमोडबाट वरिष्ठ लामा, खरसाङको मन्टिभियटबाट प्रमुख गुरु प्रताप लामा र टोली उपस्थित भएका छन्। त्यसरी नै तीनधारेको पद्ममा छ्योलिङ म्हाणिपा संघका आनीहरुद्वारा म्हाने मोलम गरिरहेको जानकारी प्राप्त भएको छ। स्याङ्देन म्हेम्हेको निधनमा तीनधारे महानदी समष्टिको सभासद नवराज छेत्री, कर्माध्यक्ष दावा वाङ्दी लामा, पञ्चायत समिति सदस्य कुसाङ लामा, पञ्चायत सदस्य राजीव तामाङ, दिपेन्द्र तामाङ, बौद्ध धर्म गुरु पेम्बा रिम्पोर्छे लगायत स्थानीयहरु र अन्यले श्रध्दाञ्जली अर्पण गरेका छन्। उनको निधनमा जीटीए प्रमुख अनित थापा, दार्जिलिङका सांसद राजु विष्ट, खरसाङका विधायक बीपी बजगाईं आदिले पनि समाजिक सञ्जालमा फोटो सेयर गरेर श्रद्धाञ्जली अर्पण गरेका छन्।
