दार्जीलिङ, 24 जुलाई(निसं): जिल्ला कानूनी सेवा प्राधिकरण (डीएलएसए)-को आयोजनामा आजदेखि जिल्ला अदालत परिसरमा मेडिकल युनिट सेन्टर शुरू गरिएको छ। उक्त युनिटको उद्घाटन जिल्ला अदालतका न्यायाधीश जिमुत वाहन बिश्वासको बाहुलीद्वारा गरियो ।
उद्घाटन समारोहमा जिल्ला अस्पतालका डा. अरिजित मन्ना, डीएलएसए का कर्मचारीहरु, प्यारालिगल भोलिन्टियरहरू र अन्य विशिष्ट व्यक्तित्वहरूको उपस्थिति रहेको थियो।
न्यायाधीश बिश्वासले जानकारी दिँदै उक्त मेडिकल युनिट सेन्टरमा डाक्टरसहित नर्सहरूको पनि उपस्थित हुने बताए। यस मेडिकल युनिटले अदालतमा कार्यरत पुलिस, कर्मचारीहरू तथा कानुनी कामका लागि आउने सर्वसाधारणलाई आकस्मिक स्वास्थ्य सेवामा सहयोग पुर्याउने न्यायाधीश जिमुत वाहन बिश्वासले बाताए । यसरी नै प्यारालिगल भोलिन्टियर रिना रायाले यो मेडिकल युनिट सप्ताहमा दुई पटक खोलिने बताउदै दार्जीलिङ जिल्ला अदालतमा पहिलोपटक यस युनिटको स्थापना गरिएको जसले धेरैलाई समयमा स्वास्थ्य सेवा उपलब्ध गराउने विश्वास व्यक्त गरिन्।
